सोमदेव क्रमवारीत ‘शंभरी’मध्ये

टेनिसमध्ये आंतरराष्ट्रीय स्तरावर एकेरी प्रकारात भारताचे प्रतिनिधित्व करणाऱ्या सोमदेव देववर्मनने अव्वल शंभर खेळाडूंमध्ये धडक मारली आहे. एक वर्ष आणि नऊ महिन्यांच्या प्रतीक्षेनंतर सोमदेवने अव्वल शंभर टेनिसपटूंच्या मांदियाळीत प्रवेश केला आहे. तीन स्थानांनी सुधारणा करत सोमदेवने ९८वे स्थान मिळवले आहे. २०११ मध्ये सोमदेवने कारकिर्दीतील सर्वोत्तम अर्थात ६२वे स्थान पटकावले होते, पण त्यानंतर खांद्याच्या दुखापतीमुळे सोमदेवची घसरण झाली होती. दुखापतीतून सावरल्यानंतर सोमदेवने अमेरिकन खुल्या स्पर्धेच्या मुख्य फेरीत तसेच वॉशिंग्टन येथे झालेल्या एटीपी ५०० स्पर्धेच्या दुसऱ्या फेरीपर्यंत मजल मारली होती. तैवान चॅलेंजर स्पर्धेत अंतिम फेरीपर्यंत धडक मारणाऱ्या युकी भांब्रीने १९० स्थानांनी सुधारणा करत २८७वे स्थान पटकावले आहे. दुहेरी प्रकारात अमेरिकन खुल्या स्पर्धेत पुरुष दुहेरीचा विजेता लिएण्डर पेस पाचव्या स्थानी स्थिर आहे. रोहन बोपण्णा सातव्या, तर महेश भूपती दहाव्या स्थानी कायम आहे. दिविज शरण ६९व्या, तर पुरव राजा ८९व्या स्थानी आहे.