नाशिकमध्ये आज राष्ट्रीय ट्रायथलॉन व अ‍ॅक्वाथॉन स्पर्धा

पोहणे, सायकल चालविणे आणि धावणे या तिघांचा एकत्रित समावेश असलेल्या ट्रायथलॉन तसेच पोहणे आणि धावणे या दोघांचा समावेश असलेल्या अ‍ॅक्वाथॉन या क्रीडा प्रकारांची राष्ट्रीय स्तरावरील स्पर्धा १८ व १९ जानेवारी रोजी येथे आयोजित करण्यात आली आहे.
भारतीय ट्रायथलॉन फेडरेशन, महाराष्ट्र राज्य ट्रायथलॉन संघटना आणि वर्ल्ड ऑफ स्पोर्ट्स सांस्कृतिक कला व क्रीडा संस्था यांच्या वतीने आयोजित ही स्पर्धा कनिष्ठ व वरिष्ठ गटात होणार असून १२ राज्यांमधील ३०० खेळाडू सहभाग घेत असल्याची माहिती महाराष्ट्र राज्य ट्रायथलॉन संघटनेचे अध्यक्ष राजेंद्र निंबाळते यांनी गुरुवारी येथे दिली.  शनिवारी सकाळी ७.३० वाजता मते नर्सरीजवळील बोटक्लब येथे स्पर्धेची सुरुवात होणार आहे.
 गोदावरीत आनंदवली पुलापर्यंत १५०० मीटर अंतर पोहून झाल्यानंतर स्पर्धकांना ४० किलोमीटर सायकलिंग व १० किलोमीटर धावावे लागणार आहे. अ‍ॅक्वाथॉन या प्रकारात स्पर्धकांना १५०० मीटर पोहण्यासह १० किलोमीटर धावावे लागणार आहे, अशी माहिती आयोजकांनी दिली.