West Indies beat England: वेस्ट इंडिजाच्या संघाने उत्कृष्ट पुनरागमन करत इंग्लंडला पराभवाचा मोठा धक्का दिला. पाच सामन्यांच्या टी-२० मालिकेतील पहिले ३ सामने गमावत विडिंज संघाने मालिका गमावली असली तरी चौथ्या सामन्यात अशी काही कामगिरी केली की इंग्लंडचा संघ अवाक् झाला. वेस्ट इंडिजने २१९ धावांच्या लक्ष्याचा पाठलाग करताना सलग ३ चेंडूत ३ मोठे विकेट गमावूनही १९ षटकांत हा धावांचा डोंगर गाठला आणि सामन्यात विजय मिळवला. यासह वेस्ट इंडिजने ७ वर्षे जुना विक्रमही आपल्या नावे केला आहे.
चौथ्या टी-२० सामन्यात इंग्लंडने प्रथम फलंदाजी करताना २० षटकांत ५ विकेट गमावत २१८ धावा केल्या. इंग्लंडचा सलामीवीर फिल सॉल्टने ३५ चेंडूत ५५ धावांची स्फोटक खेळी खेळली. तर मधल्या फळीत जेकब बेथेने वादळी फलंदाजी करत ३२ चेंडूत ६२ धावांची नाबाद खेळी खेळली. याशिवाय कर्णधार जोस बटलरने २३ चेंडूत ३८ धावा केल्या. वेस्ट इंडिजसमोर आता २१९ धावांचे लक्ष्य होते, ज्याचा पाठलाग करताना एव्हिन लुईस आणि शे होप या दोन्ही सलामीवीरांनी तुफान फटकेबाजी केली. दोघांनी पहिल्या ९ षटकांत १३६ धावा केल्या. पण, यानंतर या सामन्यात अचानक इंग्लंडने पुनरागमन केले.
ग
१०व्या षटकाच्या पहिल्या ३ चेंडूत वेस्ट इंडिजने ३ मोठ्या विकेट गमावल्या. सलामीवीर एव्हिन लुईस प्रथम बाद झाला. त्यानंतर शे होप आणि नंतर निकोलस पूरन बाद झाले. वेस्ट इंडिजची धावसंख्या बिनबाद १३६ धावा होती, त्यावरून ३ बाद १३६ धावांवर पोहोचली. तीन विकेट्समुळे सामना अचानक फिरल्याने इंग्लंडच्या आशाही उंचावल्या होत्या. पण, वेस्ट इंडिजने मात्र आपली कामगिरी सुरू ठेवली.
सलामीवीरांच्या उत्कृष्ट कामगिरीनंतर कॅरेबियन कर्णधार रोव्हमन पॉवेलने संघाचा डाव पुढे नेला. कर्णधाराला रदरफोर्डनेही चांगली साथ देत संघाच्या विजयात मोठी भूमिका बजावली. वेस्ट इंडिजकडून सलामीवीर एविन लुईसने ३१ चेंडूत सर्वाधिक ६८ धावा केल्या. तर दुसरा सलामीवीर शे होपने २४ चेंडूत ५४ धावा केल्या. कर्णधाराने २३ चेंडूत ३८ धावा केल्या. तर रदरफोर्ड १७ चेंडूत २९ धावा करून नाबाद परतला.
वेस्ट इंडिजने मोडला ७ वर्षे जुना विक्रम
इंग्लंडने दिलेले २१९ धावांचे लक्ष्य वेस्ट इंडिजने एक षटक आणि ५ गडी गमावून पूर्ण केले. यासह, त्याने आंतरराष्ट्रीय टी-२० मध्ये घरच्या मैदानात सर्वात मोठ्या लक्ष्याचा पाठलाग करण्याचा ७ वर्षांचा जुना विक्रमही मोडला. वेस्ट इंडिजने २०१७ मध्ये मायदेशात भारतासमोर १९४ धावांचे लक्ष्य गाठले होते. पण आता वेस्ट इंडिजने ५ बाद २२१ धावा करत २१९ धावांचे लक्ष्य गाठले.
