‘एआयबीए’ जागतिक अजिंक्यपद बॉक्सिंग स्पर्धेच्या उपांत्य फेरीत कझाकस्तानच्या मखमूद सबायरखान याच्याकडून पराभवामुळे भारताच्या पदार्पणवीर आकाश कुमारला (५४ किलो) कांस्यपदकावर समाधान मानावे लागले. २१ वर्षीय आकाशने मखमूदकडून ०-५ अशी हार पत्करली. आकाशच्या पराभवासह भारताचे स्पर्धेतील आव्हान संपुष्टात आले. विजेंदर सिंग, विकास क्रिशन, शिवा थापा, गौरव बिधुरी, अमित पंघाल आणि मनीष कौशिक यांच्यानंतर जागतिक स्पर्धेत पदक जिंकणारा आकाश हा सातवा भारतीय पुरुष बॉक्सिंगपटू ठरला. या पदकासह त्याने २५ हजार डॉलरचे बक्षीसही जिंकले.