भगवान शंकराचा गण असलेल्या वीरभद्र या नावावरून या आसनाला वीरभद्रासन असे नाव पडले आहे. इंग्रजीमध्ये या आसनाला वॉरिअर पोझ असे म्हटले जाते. या आसनाचे दोन प्रकार आहेत. सध्या आपण वीरभद्रासन १ हा प्रकार पाहू. या आसनामुळे हात, खांदे, गुडघे, मांडय़ा आणि कंबरेचे स्नायू बळकट होतात. कसे करावे? * दोन्ही पायांमध्ये तीन ते चार फुटांचे अंतर ठेवा आणि सरळ उभे राहा. * उजवा पाय मागच्या बाजूला घेऊन थोडा पसरवा. हा पाय पसरवताना गुडघ्यात दुमडला नाही पाहिजे. * डावा पाय पुढे करून गुडघ्यात दुमडवा. * दोन्ही हात सरळ हवेत पसरवा. हाताचे तळवे वरच्या बाजूला असावेत. * थोडा वेळ याच स्थितीत राहा. नंतर श्वास घेत सामान्य स्थितीत या. * आता हेच आसन डाव्या बाजूने करावे.