आघाडीची टेलिकॉम कंपनी रिलायन्स जिओने 4G डाउनलोड स्पीडमध्ये आपला दबदबा कायम ठेवलाय. तर, अपलोड स्पीडमध्ये व्होडाफोन-आयडिया (Vodafone Idea) अव्वल ठरली आहे. टेलिकॉम रेग्युलेटरी ऑथॉरिटी ऑफ इंडियाने (ट्राय) डिसेंबर महिन्यातील आकडेवारी आपल्या MySpeed पोर्टलवर जारी केली आहे. ट्रायने जारी केलेल्या आकडेवारीनुसार, जिओचा डिसेंबर महिन्यातील सरासरी डाउनलोड स्पीड 20.2 Mbps नोंदवण्यात आला. नोव्हेंबरमध्ये जिओचा डाउनलोड स्पीड 20.2 Mbps होता. दुसरीकडे, एअरटेलला मात्र झटका बसलाय. त्यांचा डाउनलोड स्पीड नोव्हेंबर महिन्यापेक्षाही कमी नोंदवण्यात आला असून क्रमवारीमध्ये एअरटेल व्होडाफोन आणि आयडियाच्याही खाली गेली आहे. व्होडाफोन आणि आयडिया सेल्यूलर या दोन्ही कंपन्या व्होडाफोन-आयडिया म्हणून एकत्र आल्या असल्या तरी ट्राय मात्र दोन्ही कंपन्यांचे आकडे वेगवेगळे दाखवते. त्यानुसार डाउनलोड स्पीडमध्ये जिओनंतर दुसऱ्या क्रमांकावर 9.8 Mbps डाउनलोड स्पीडसह व्होडाफोन आहे. तर 8.9 Mbps डाउनलोड स्पीडसह तिसऱ्या क्रमांकावर आयडिया आहे. याशिवाय गेल्या डिसेंबरमध्ये एअरटेलचा डाउनलोड स्पीड केवळ 7.8 Mbps इतका नोंदवण्यात आला. नोव्हेंबरमध्ये एअरटेलचा डाउनलोड स्पीड 8.0 Mbps होता. म्हणजेच नोव्हेंबरच्या तुलनेत डिसेंबरमध्ये एअरटेलचा डाउनलोड स्पीड कमी झालाय.
