फेसबुक करणार WhatsApp आणि Instagram चं बारसं, ही असणार नवीन नावं

इन्स्टाग्राम आणि व्हॉट्स अॅपचे स्वत:चे वेगळे व्यवस्थापक, कामगार आणि ऑफिस आहेत. मात्र मागील वर्षांपासून फेसबुकने या कंपन्यांवर हळूहळू आपले अधिकार गाजवण्यास सुरुवात केली आहे. त्याचाच एक भाग म्हणून शुक्रवारी फेसबुकने या दोन्ही लोकप्रिय अॅप्लिकेशन्सचे रिब्रॅण्डींग करणार असल्याचे जाहीर केले आहे. फेसबुक या दोन्ही अॅप्लिकेशनची नावे बदलणार आहे. इन्स्टाग्रामचे नाव बदलून ‘इन्स्टाग्राम फ्रॉम फेसबुक’ आणि व्हॉट्स अॅपचे नाव बदलून ‘व्हॉट्स अॅप फ्रॉम फेसबुक’ असं करण्यात येणार आहे.

ही दोन्ही लोकप्रिय अॅप्लिकेशन्स आपल्या मालकीची आहेत हे दाखवण्यासाठी फेसबुक त्यांची नावे बदलणार आहे. ‘द इन्फॉर्मेशन’ला फेसबुकच्या प्रवक्त्यांनी दिलेल्या माहितीनुसार हे प्रोडक्ट आणि सेवा फेसबुकच्या मालकीचे आहेत हे दाखवण्यासाठी हे बदल करण्यात येणार आहे. भविष्यात फेसबुक, व्हॉट्स अॅप आणि इन्स्टाग्राम एकमेकांशी संग्लन करण्याचा कंपनीचा विचार असल्याचीही चर्चा आहे.

‘इन्स्टाग्राम फ्रॉम फेसबुक’ आणि ‘व्हॉट्स अॅप फ्रॉम फेसबुक’ ही बदललेली नावे गुगल प्लेवर आणि अॅपलच्या आयस्टोअरवर दिसतील. एका वृत्तानुसार हे बदल केवळ अॅण्ड्रॉइड आणि आयओएसच्या अॅप स्टोअर पेजेसवर दिसणार आहेत. तसेच या दोन्ही साईटच्या लॉगइन पेसेजवरील नावांच्या नंतरही ‘फ्रॉम फेसबुक’ या शब्दांचा समावेश केला जाणार आहे. मात्र या बदलांबरोबरच दोन्ही अॅप्लिकेशनमध्ये नवीन फिचर्सचा समावेश करण्यात येणार आहे की नाही याबद्दलची माहिती कंपनीने दिली नाही.

दोन्ही कंपन्यांची मालकी घेतल्यानंतर फेसबुकने इन्स्टाग्राम आणि व्हॉट्स अॅपवर अनेक नवीन फिचर्स उपलब्ध करुन दिले आहेत. उदाहर्णार्थ इन्स्टाग्रामवरील स्टोरीजची संकल्पना व्हॉट्स अॅपवर स्टेटसच्या तर फेसबुकवर स्टोरीच्या स्वरुपात अंमलात आणण्यात आली. फेसबुकने या कंपन्यांना विकत घेतल्यापासून या दोन्ही अॅप्लिकेशनचे वापरकर्ते वाढावेत म्हणून कंपनी विशेष प्रयत्न करताना दिसत आहे. मागील वर्षभरामध्ये सुरक्षा आणि डेटा चोरीवरुन फेसबुक अनेक प्रकरणांमध्ये अडकल्याचे पहायला मिळाले. मात्र या गोंधळापासून इन्स्टाग्राम आणि व्हॉट्स अॅप या दोन्ही कंपन्यांना लांबच ठेवण्यात आले होते. त्यांच्या विश्वासार्हतेवर कधीच प्रश्नचिन्ह उपस्थित राहिले नाही. मात्र लवकरच फेसबुक या दोन कंपन्यांमध्येही मोठा फेरबदल करण्याची शक्यता व्यक्त केली जात आहे.