Healthy Food: केक आणि ब्रेडपासून ते समोसा, वडापाव, सँण्डवीचपर्यंत अशा आपल्याला आवडणाऱ्या बहुतेक फास्ट फूडमध्ये मैदा वापरला जातो. मैदा आरोग्यासाठी चांगला नाही हे आपण अनेकदा ऐकतो. एस्टर सीएमआय हॉस्पिटलमधील क्लिनिकल न्यूट्रिशनिस्ट एडविना राज यांनी याची पुष्टी केली आणि सांगितले की, “मैदा खूप प्रक्रिया केलेला आणि पोषक तत्वांपासून वंचित आहे. मैदा रक्तातील साखरेचे प्रमाण वाढवू शकते आणि पचनाच्या समस्या निर्माण करू शकते,” असे त्या म्हणाल्या.
चांगल्या आरोग्यासाठी, मैद्याचे नकारात्मक परिणाम ओळखून घेणे आणि पोषक तत्वांनी समृद्ध आणि बहुमुखी पर्यायांचा शोध घेणे महत्त्वाचे आहे.
मैद्याऐवजी इतर पर्याय
गव्हाचे पीठ : भारतीय स्वयंपाकघरांमध्ये सर्वात सहज उपलब्ध असलेल्या पर्यायांपैकी एक असलेले गव्हाचे पीठ हे मैद्यासाठी एक उत्तम पर्याय आहे. “गव्हाचे पीठ हा मैद्याच्या ऐवजीचा सर्वात जवळचा पर्याय आहे. ते अधिक फायबर, पोषक तत्व देते, शिवाय हे आतड्यांसाठीदेखील चांगले आहे. ते पोळी, पराठे, ब्रेड आणि केक बनवण्यासाठीही चांगला पर्याय आहे. शिवाय याच्या सेवनाने पोट भरल्यासारखे वाटते, ज्यामुळे सतत भूक लागत नाही. हे वजन कमी करणाऱ्यांसाठी फायदेशीर आहे,” असे एडविना यांनी सांगितले.
बदामाचे पीठ : एडविना राज म्हणाल्या की, “बदामाचे पीठ ग्लूटेन-मुक्त आहे आणि निरोगी चरबींनी भरलेले आहे, ज्यामुळे ते कमी-कार्ब आणि केटो सर्कलमध्ये आवडीचे बनते. बारीक कुस्करलेल्या बदामांपासून बनवलेले, ते बेक्ड पदार्थांना एक उत्तम चव आणि पौष्टिकता देते.”
ओट्स पीठ : “ओट्स पीठ घरी बारीक करून सहज बनवता येते. ते विरघळणाऱ्या फायबरने भरलेले असते, विशेषतः बीटा-ग्लुकन, जे कोलेस्ट्रॉल कमी करण्यास आणि रक्तातील साखर स्थिर करण्यास मदत करते. ओट्सच्या पिठाची चव थोडी गोड असते आणि ती मफिन, पॅनकेक्स आणि डोसा पिठातही चांगली काम करते. रचनेसाठी ते इतर पिठांबरोबर मिसळा,” असे एडविना राज म्हणाल्या.
नाचणीचे पीठ : भारतातील एक पारंपरिक धान्य असलेल्या नाचणीमध्ये कॅल्शियम, लोह आणि अमिनो आम्ल भरपूर प्रमाणात असतात. “हे ग्लूटेन-मुक्त आहे, पचायला सोपे आहे आणि भाकरी, लाडू किंवा कुकीज बनवण्यासाठीदेखील योग्य आहे,” असे एडविना राज म्हणाल्या.
चण्याचे पीठ : चण्याच्या पिठात प्रथिने आणि फायबर भरपूर असतात. “भारतीय स्वयंपाकघरांमध्ये भजी बनवण्यापासून ते लाडू, शेव, चिवडा बनवण्यापर्यंत अशा अनेक पदार्थांमध्ये ते वापरले जाते. बेसन नैसर्गिकरित्या ग्लूटेन-मुक्त आहे, ज्यामुळे ते चवदार पाककृतींसाठी एक उत्तम पर्याय बनते”, असे एडविना राज म्हणाल्या.
