आज रोझ डे (Rose Day)! व्हॅलेंटाईन डे ( Valentine’s Day )सीझन सुरू झालाय. तुमच्या आसपास बघा कशा जोड्या फटाफट जुळत आहेत ते. आता व्हॅलेंटाईन डेच्या आधीचे डेज् सुध्दा सगळेजण साजरे करतात. या दिवसांमध्ये तिला किंवा त्याला सांगून टाका तुमच्या मनात काय आहे ते. पण हे करतानाही लक्षपूर्वक, कारण जरा काही चुकलं तर भलताच मेसेज जायचा. तेव्हा आजच्या रोज् डे साठी गुलाबाच्या फुलांच्या वेगवेगळ्या रंगाचे अर्थ आम्ही तुम्हाला सांगणार आहोत.
लाल गुलाब
आता या रंगाचा अर्थ सांगण्याची कोणाला गरज नाही. अनादी काळापासून जगभरातल्या प्रेमिकांनी या रंगाचा गुलाब देत आपल्या प्रेमाचा ‘इजहार’ केला आहे. तुमच्या मनात ‘त्या’ स्पेशल व्यक्तीबददल खरोखर प्रेमाची भावना असेल तर बेधडक लाल गुलाब देऊन टाका. त्याला किंवा तिला तुमच्या मनातल्या भावना लगेचच समजतील.
गुलाबी गुलाब
प्रेमात पडतानाही लक्षपूर्वक पडायचं असतं भाऊ. हिंमत लागते. प्रेमाच्या आणभाका घेण्याआधी त्या व्यक्तीचा स्वभाव. त्याच्या किंवा तिच्या आवडीनिवडी हेही कळणं आवश्यक असतं. तुम्हीपण अशा सिच्युएशनमध्ये आहात का? मग बिनधास्त गुलाबी रंगाचं गुलाबाचं फूल देऊन टाका. ‘मला तुझ्याविषयी आणखी जाणूव घ्यायचं आहे’ हा संदेश समोरच्यापर्यंत बिनचूक पोचेल. आता हे सगळं आपण व्हाॅट्सअॅपवरनं वगैरेपण बोलत असतो. पण यार रोज् डेच्या दिवशी अशा पध्दतीने आपलं म्हणणं सांगणं यात आणखीच बात आहे!
जांभळा गुलाब
कधीकधी ना बात एकदम क्लिक होते. त्या व्यक्तीला पहिल्यांदा पाहताच ‘मन मे लड्डू’ फुटतात, व्हायोलिन्स वाजतात, कधीकधी ‘प्रथम तुज पाहता’ ची धून वाजते (वाईट होता,पण असो). अशा वेळी काही सुचत नाही, काय बोलायचं कळत नाही.
सो इन शाॅर्ट, ‘तुम मेरेको पहिली नजर में आवड्या’ चा मेसेज द्यायचा असेल तर बाजारात जरा जास्त पायपीट करा आज आणि जांभळा गुलाब शोधून काढा. मेहनत थोडी जास्त आहे, पण लव्ह अॅट फर्स्ट साईटचा दमदार मेसेज समोरच्या पार्टीला द्यायचा असेल तर एवढी मेहनत पायजेल.
पिवळा गुलाब
व्हॅलेंटाईन डे काय आशिकांचाच आहे का? मित्रमैत्रिणींनी या दिवशी काय करायचं? जास्त कल्पनाशक्ती ताणू नका पण फेसबुकवर फोटोच्या खाली ‘नाईस क्लिक डिअर’, ‘फ्रँडशिप’ वगैरेंच्या काॅमेंट्स टाकण्यापेक्षा त्या व्यक्तीला पिवळा गुलाब देणं कधीही चांगलं. मला तुझ्याशी मैत्री करायची आहे हा मेसेजसुध्दा समोर थेट पोचतो आणि इंग्लिशमधल्य़ा स्पेलिंग मिस्टेकमधून इंप्रेशन डाऊन होण्याचा धोकापण दूर होतो.
नारिंगी गुलाब
पिवळा, नारिंगी हे रंग धगधगत्या आगीशी जोडले जातात. कल्पनाशक्ती आता इथे ताणा.
हिरवा गुलाब
हा पण गुलाब असतो. हिरवा रंग निसर्गाची आठवण करून देतो. त्यामुळे एक नव्या सुरूवातीशी, नव्या निर्मितीशी या रंगाचं नातं जोडलं जातं. कोणाच्या आयुष्यात एका नव्या पर्वाला सुरूवात होत असेल तर तुम्ही तुमच्या सदिच्छा हिरवा गुलाब देत कळवू शकता
पांढरा गुलाब
पांढरा गुलाबही एका नव्या पर्वाची सुरूवात किंवा शेवटसुध्दा दर्शवतो. तेव्हा हा गुलाब देताना जरा जपून
काळा गुलाब
काळाबिळा रंग मृत्यूबित्यूशी जोडलाबिडला जातो. त्यामुळे तुमची प्रिय व्यक्ती ब्लॅक मेटल राॅक म्युझिकची चाहती असेल, काॅमन गोष्टींचा तिला तिटकारा असेल किंवा दिक्कालातून आरपार जाणारी तिची सौंदर्यदृष्टी वगैरे असेल तरच हा गुलाब निवडा. (थोडक्यात, शक्यतो फंदात पडू नका)
वाचा- Happy Rose Day 2017 : रोझ डे मेसेज सजेशन्स
एकूणच ‘व्हॅलेंटाईन डे’चा सीझन सिंबाॅलिझमचाही आहे. तेव्हा हृदयासोबत डोकंपण लावा. ‘नजर हटी दुर्घटना घटी’ व्हायला नको!
