‘या’ डाळी आरोग्यासाठी आहेत अत्यंत पौष्टिक; दररोज करा सेवन

दररोज डाळींचे सेवन केल्याने शरीरात रक्ताची कमतरता कधीच भासत नाही. डाळींचे सेवन केल्याने कॅल्शियमची कमतरता पूर्ण होते. डाळी अशक्तपणा आणि थकवा दूर करण्यासाठी आणि शरीराला ऊर्जावान बनवण्यासाठी उपयुक्त आहेत. आपण दररोज कोणत्या डाळींचे सेवन करतो आणि त्याचे फायदे काय आहेत ते जाणून घेऊ

दैनंदिन आहारात करा ‘या’ डाळींचा समावेश

मूग डाळ

मूग डाळीचे सेवन आपण अनेकदा खिचडी किंवा वरणामधून करतो. मूग डाळ पालक-मेथीसह बनवली जाते. या डाळीमध्ये भरपूर प्रथिने, मॅग्नेशियम, पोटॅशियम, फायबर, फॉस्फरस, तांबे, जस्त आणि मॅग्नेशियम असते. या डाळीचे सेवन केल्याने पचनक्रिया निरोगी राहते आणि मधुमेह नियंत्रित राहतो.

उडीद डाळ

उडीद डाळीमध्ये पोषक प्रथिने, फायबर, लोह, फॉस्फरस आणि कॅल्शियम असते; जे शरीर निरोगी ठेवते आणि हाडे मजबूत करते. ही दाळ बहुतेकदा इडली, डोसा, दही वड्यामध्ये वापरली जाते. ही डाळ खाल्ल्याने स्नायू मजबूत होतात आणि शरीराला ऊर्जा मिळते.

तूर डाळ

मसूर डाळीपेक्षा तुरीच्या डाळीमध्ये प्रथिने कमी असतात. १०० ग्रॅम तूर डाळीमध्ये असलेल्या पोषक तत्वाबद्दल बोलायचे झाले तर यात प्रथिने २२ ग्रॅम, फायबर १५ ग्रॅम, आयर्न ३.१ मिली ग्राम, फॉलिक अॅसिड जास्त प्रमाणात आणि कॅल्शियम ७३ मिलीग्राम असते जे शरीर निरोगी ठेवते. या डाळीचे सेवन केल्याने शरीराला ऊर्जा मिळते. गर्भवती महिलांसाठी ही डाळ खाणे खूप प्रभावी ठरते.

मसूर डाळ

१०० ग्रॅम मसूर डाळीमध्ये प्रथिने २४ ग्रॅम, फायबर १२ ग्रॅम, लोह ६.५ मिलीग्राम, पोटेशियम- ३६९ मिलीग्राम आणि फोलेट असते. या डाळीचे सेवन केल्याने पचनक्रिया चांगली राहते. मधुमेह नियंत्रित राहतो आणि वजनही कमी होते. ही डाळ शरीरातील रक्ताची कमतरता पूर्ण करते. पचायला खूप हलकी असते. महिलांनी या डाळीचे सेवन केल्याने त्यांना शरीराला अधिक फायदा होईल.