Soaked Fenugreek Seeds Benefits: आपल्या स्वयंपाकघरात अशा अनेक गोष्टी असतात, ज्या आरोग्यासाठी खूप फायदेशीर असतात. अशीच एक गोष्ट म्हणजे मेथी. मेथीचे दाणे (Fenugreek Seeds) असो किंवा मेथीची भाजी, मेथी आरोग्यासाठी फायदेशीर असते. साधारणपणे याचा वापर अन्नात चव वाढवण्यासाठी केला जातो, तर आयुर्वेदात याचे वर्णन औषध म्हणून केले आहे. तुमच्या स्वयंपाकघरात असलेला एक साधा मसाला, मेथी दाणा तुमचं आरोग्य अक्षरशः बदलू शकतो, हे तुम्ही ऐकलंय का?
थोडा कडवट चव असलेला, पिवळसर रंगाचा हा मसाला फक्त अन्नाची चव वाढवत नाही, तर शरीरासाठी अमृतासमान ठरतो. मेथी शरीरासाठी खूपच फायदेशीर असते. यामध्ये अनेक पोषकतत्व आढळतात. खाण्यात स्वादिष्टपणा आणण्यापासून ते अगदी पचनशक्ती चांगली राहण्यापर्यंत मेथीच्या दाण्यांचा वापर करून घेता येतो. आयर्न, मॅग्नेशियम, फायबर, B6 आणि अँटीऑक्सिडंट्सने भरलेला हा पदार्थ पचन सुधारतो, रक्तातील हिमोग्लोबिन वाढवतो आणि मेटाबॉलिजमला जबरदस्त बूस्ट देतो. एका संशोधनानुसार, भिजवलेल्या मेथीच्या दाण्याचे पाणी हे अनेक आजारांवर गुणकारी ठरते. मेथीच्या दाण्याचे पाणी प्यायल्याने आरोग्याला अनेक फायदे होतात. मात्र, याचे सेवन कसे आणि किती प्रमाणात करावे हेदेखील माहीत असायला हवे. मेथीचे पाणी उपाशीपोटी पिण्याचे फायदे जाणून घ्या.
डायबिटीजवर नियंत्रण
एका अभ्यासात असे दिसून आले की, मेथीच्या दाण्याचे सेवन केल्याने रक्तातील साखरेचे प्रमाण, BMI आणि A1c लेव्हल्स नियंत्रित राहतात. काही तज्ज्ञ म्हणतात, पिठात मेथीची पूड मिसळल्यास मधुमेह रुग्णांची पोळी खाऊनही साखर वाढत नाही.
हृदयासाठी वरदान
मेथी दाणे पाणी प्यायल्याने कोलेस्ट्रॉल नियंत्रणात राहते. यात असलेला सॉल्युबल फायबर LDL (वाईट) कोलेस्ट्रॉल शरीरात शोषले जाण्यापासून रोखतो. शिवाय, पोटॅशियम आणि मॅग्नेशियममुळे रक्तप्रवाह सुधारतो.
महिलांसाठी सुपरफूड
मासिक पाळीतील अस्वस्थता, हार्मोनल असंतुलन यावर मेथीचा प्रभावी उपयोग होतो. नियमित सेवनाने हार्मोन्स बॅलेन्स होतात आणि थकवा दूर होतो.
मांसपेशींना बळकटी
संशोधन सांगते, मेथीच्या दाण्याचा रोजचा वापर शरीराची ताकद आणि वजन वाढवतो. विशेषतः अशक्त लोकांसाठी हे खूप उपयोगी आहे.
पचनसंस्थेवर परिणाम
फायबरयुक्त असल्याने, मेथीचा दाणा मलावरोध, ब्लोटिंग आणि अपचनावर रामबाण उपाय आहे.
पण लक्षात ठेवा अति वापर केल्यास मेथीचे दुष्परिणाम होऊ शकतात. अपचन, भूक न लागणे किंवा सैल शौचासारख्या समस्या उद्भवू शकतात.
