संक्षेपात..

औषधसाक्षरतेसाठी..
जनमानसातील औषध साक्षरता वाढावी, यासाठी ‘लोकसत्ता’मध्ये लेखिकेने लिहिलेल्या लेखांचे संकलन ‘औषधभान’ या पुस्तकाच्या रूपाने करण्यात आले आहे. औषधांचा योग्य वापर व्हावा, औषधांबद्दलची जागरूकता वाढावी आणि औषधे जबाबदारीने घेतले जावे अशी अनेक उद्दिष्टे बाळगून हे पुस्तक लिहिले आहे. यात प्रिस्क्रिप्शन वाचणे, वेदनाशामक औषधे घेणे, औषधांची मुदत लक्षात घेणे, मानसिक आजार आणि औषधे, औषधे घेताना.., टॅब्लेट्सच्या दुनियेत.., पिल्सचा वापर-गैरवापर अशा विविध बाबींवर स्वतंत्र प्रकरणे बेतली आहेत. त्याचसोबत औषधांसंदर्भातील काही उपयुक्त वेबसाइट्स, पत्ते आणि फॉर्मस्ही पुस्तकात समाविष्ट करण्यात आले आहेत. औषध रक्षक ठरावे की भक्षक, हे जाणून घेण्यासाठी हे पुस्तक उपयुक्त ठरेल.
औषधभान – प्रा. मंजिरी घरत, मेनका प्रकाशन, पृष्ठे – १२६, मूल्य – १५० रु.

मनात रेंगाळणारा कालपुरुष
मनात उतरलेला, रेंगाळणारा समुद्र जेव्हा कवीच्या मनात उभा ठाकतो, त्यावेळेस त्याच्या मनात विचारांची जी आवर्तने तयार होतात, त्याचे शब्दरूप म्हणजे उत्तम कांबळे यांची हा कवितासंग्रह. मनाला येणारी भरती-ओहोटी या कवितांमधून दिसते. समुद्राविषयीचे विविध संदर्भ या कवितांमधून भेटतात. त्याच्या प्रत्येक कवितेत समुद्र हा सामायिक असतो. म्हणूनच कालपुरुषासारखा तो कवीला भासतो. निसर्ग, माणूस, जगणे, भावभावना, नाती या साऱ्याला समुद्राच्या असण्या-भासण्याची जोड कवीने दिली आहे.
किनाऱ्यावरचा कालपुरुष,  उत्तम कांबळे, लोकवाङ्मय गृह, पृष्ठे – ११५, मूल्य – २०० रुपये.