News Flash

खड्डय़ांमुळे राज्यात १६६ जणांचा अपघाती मृत्यू

२०१८ मध्ये खड्डय़ांमुळे झालेल्या एकूण ५५२ प्राणांतिक अपघातात ५४८ जण जखमी झाले आहेत.

२०१८ मधील आकडेवारी; बुलढाणा, लातूर, सोलापूर, नंदुरबार, नवी मुंबई, नागपूरमध्ये सर्वाधिक अपघात

मुंबई : राज्यात खड्डय़ांमुळे झालेल्या अपघातांत जानेवारी २०१८ ते डिसेंबर २०१८ मध्ये १६६ जणांचा मृत्यू झाला. बुलढाण्यात म्हणजे ३० जणांचा मृत्यू झाले असून त्यापाठोपाठ लातूर, सोलापूर, नंदुरबार, नवी मुंबईमध्ये बळी गेले असल्याचे महामार्ग पोलिसांनी जाहीर केलेल्या आकडेवारीतून स्पष्ट झाले आहे.

खड्डय़ांमुळे होणाऱ्या अपघातांचे प्रमाण पाहता याप्रकरणी संबंधित रस्त्याच्या कंत्राटदारावर किंवा टोलवसुली करणाऱ्या कंपनीवर जबाबदारी निश्चित करण्याच्या सूचना परिवहनमंत्री दिवाकर रावते यांनी रस्ते सुरक्षा सप्ताहाच्या बैठकीत संबंधित विभागांना दिल्या आहेत.

२०१८ मध्ये खड्डय़ांमुळे झालेल्या एकूण ५५२ प्राणांतिक अपघातात ५४८ जण जखमी झाले आहेत. उपराजधानी नागपूरमध्येही अपघाताचे प्रमाण मोठे आहे. १११ अपघातांत ६ जणांचा मृत्यू झाला असून १२८ जण जखमी झाले आहेत. रस्त्यांच्या सुमार दर्जाच्या कामांमुळे मोठय़ा प्रमाणात खड्डे पडतात. यातून वाट काढताना चालकांना मोठी कसरत करावी लागते. पावसाळ्यात खड्डय़ांचे प्रमाण मोठय़ा प्रमाणात वाढल्याने अपघातांचे प्रमाणही याच तीन महिन्यात अधिक असते. वाहन चालवताना खड्डे न दिसणे, अचानक खड्डय़ात वाहन गेल्यास ब्रेक लावणे यामुळे मागून किंवा समोरून येणाऱ्या अन्य वाहनाची धडक लागून चालक किंवा त्याच्या सहकाऱ्यांना अपघातांना सामारे जावे लागण्याच्या घटना घडत असतात.

२०१७ मध्ये अपघातांचे प्रमाण अधिक

२०१७ मध्ये राज्यात खड्डय़ांमुळे २३७० प्राणांतिक अपघात झाले, यात ७२६ जणांचा बळी गेला होता. तर २२१३ जण जखमी झाले होते. दाखल झालेल्या गुन्ह्य़ांच्या आधारे २०१८ मध्ये या अपघातांची नोंद होऊ लागली. त्यामुळे अपघातांचे प्रमाण कमी आढळते. २०१७ मध्ये गुन्ह्य़ांच्या आधारे अपघातांची नोंद होत नव्हती. प्रत्यक्षदर्शी किंवा सरसकट त्याची नोंद खड्डय़ांमुळे केली जात असे. सर्वोच्च न्यायालयाने गुन्ह्य़ांच्या आधारे नोंद करण्याच्या सूचना करताच २०१८ पासून त्याप्रमाणे नोंद होऊ लागली.

 

सर्वाधिक अपघात झालेली ठिकाणे

अपघातांची  ठिकाणे       प्राणांतिक अपघात     मृत्यू            जखमी

 

बुलढाणा                                      ७०                    ३०              ८०

नांदेड                                           ३२                     ५               १८

लातूर                                           ६४                    १९              ४९

पुणे ग्रामीण                                  १९                    १०             १६

सोलापूर                                        ८२                     २८            १०५

गडचिरोली                                   २३                       १७             ९

नंदुरबार                                        ६२                       १८          ७३

ठाणे ग्रामीण                                  २२                       ११            २५

ठाणे शहर                                        ५                          ३            २

मुंबई शहर                                        १                         २             —

नवी मुंबई                                        ३४                    ११               २५

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on May 31, 2019 5:52 am

Web Title: 166 people killed in road accidents due to pothole
Next Stories
1 आर्थिक  दुर्बलांना यंदा आरक्षण नाही
2 Narendra Modi Cabinet : महाराष्ट्राच्या वाटय़ाला आठ मंत्रिपदे
3 ‘सोयरे सकळ’ला प्रथम पारितोषिकासह ९ बक्षिसे
Just Now!
X