चंद्रपूर जिल्ह्यामध्ये २४ तासात आणखी २०३ कोरोना बाधितांची नोंद झाली असून जिल्ह्यातील एकूण बाधितांची संख्या २ हजार ५४७ वर पोहोचली आहे. सध्या उपचार घेत असणाऱ्या बाधितांची संख्या १ हजार २६९ असून आतापर्यंत १ हजार २४९ बाधित कोरोनातून बरे झाले आहेत. जिल्ह्यात गेल्या २४ तासांत तीन बाधितांचा मृत्यू झाला आहे. यामध्ये, बाबुपेठ चंद्रपूर येथील ५५ वर्षीय पुरूष बाधिताचा मृत्यू झाला आहे. या बाधिताला २२ ऑगस्टला शासकीय वैद्यकीय महाविद्यालय व रुग्णालय येथे भरती करण्यात आले होते. तसेच ४५ वर्षीय ऊर्जानगर चंद्रपूर येथील पुरुष बाधिताचाही मृत्यू झाला आहे. या रुग्णाला २० ऑगस्टला शासकीय वैद्यकीय महाविद्यालय व रुग्णालयात भरती करण्यात आले होते. बाधिताला कोरोना व्यतिरिक्त श्वसनाचा आजार होता. तर तिसरा मृत्यु हा ६५ वर्षीय गांधी वार्ड बल्लारपूर येथील पुरुष बाधिताचा झाला आहे.
