मी लस घेतली, तुम्ही पण घ्या.असा संदेश देत वर्धेतील एका ९५ वर्षीय आजींनी राज्यातील लसीकरण मोहीमेस एकप्रकारे ऊर्जाच दिल्याचे अनोखे उदाहरण पुढे आले आहे. सावंगी मेघे लगत राहणाऱ्या भुतडा परिवारातील कमलादेवी गणेशनारायनजी भुतडा या आजींचा लस घेण्याचा आग्रह कुटुंबासाठी आश्चर्यकारक ठरला. चालता व व्यवस्थित बोलता येत नसल्याने या आजी लसीपासून दूर होत्या, मात्र मुलगा नंदकिशोर हा फार्मासिस्ट असल्याने घरी करोना विषयी चर्चा व्हायची. ती ऐकून आजींनी विचारपूस केल्यावर सून मीना भुतडा यांनी त्यांना सावंगीच्या रुग्णालयात लस देण्याचे ठरविले. पण सावंगीत गर्दी असते..मला दुसरीकडे न्या असे आजीने म्हटल्यावर या परिवाराचे स्नेही व रोटरीचे पदाधिकारी राजकुमार जाजू यांनी स्वाध्याय मंदिरातील केंद्राची माहिती दिल्याचे ओम भुतडा यांनी सांगितले. त्यानुसार आजी या केंद्रावर पोहोचल्या व केंद्रात संगीता इंगळे यांनी आजीचे स्वागत करीत नीट चालूही न शकणाऱ्या आजींना लस देण्याबाबत उपस्थित डॉक्टरांना सुविधा देण्याची विनंती केली. त्यानंतर आजीने लसीचा पहिला डोस घेतला.
