प्रगतीचा झाला तेवढा उत्कर्ष पुरे – नाराज प्रवांशांची प्रतिक्रिया

आम्हाला नवीन रेल्वे देणार असल्याचे सांगितले होते. मात्र त्याऐवजी प्रशासनाने आहे त्याच गाडीला रंग देऊन, वॉलपेपर लावून कामचलाऊपणा केला आहे. रेल्वे वेगात असताना स्वच्छतागृहातील टाईल्स आणि खिडकीचे ग्रिल प्रवाशांच्या डोक्यात पडेल की काय अशी आम्हाला भिती वाटते असेही नियमित प्रवास करणाऱ्या वकील महिनेने मिड-डे शी बोलताना सांगितले. रेल्वेच्या स्वच्छतागृहामध्ये टाईल्स कोण लावतं असा प्रश्न विचारत या टाईल्सच्या मध्ये लावण्यात आलेले व्हाईट सिमेंट अनेक ठिकाणी पडले असल्याचेही प्रवाशाने सांगितले. ही सुपरफास्ट ट्रेन असून ती दर २५ किलोमीटरवर थांबते मात्र या रेल्वेची अवस्था अतिशय वाईट आहे. याठिकाणी असणाऱ्या सिंकमधील पाण्याचा घाण वास संपूर्ण कोचमध्ये पसरतो आणि तो अतिशय त्रासदायक ठरतो असे कर्जत रेल्वे प्रवासी संघटनेचे अध्यक्ष प्रभाकर गंगावणे म्हणाले.

गाडीतील कोच बसण्यासाठी योग्य नसल्याने नियमित प्रवास केल्याने पाठदुखीचा त्रास उद्भवू शकतो असेही काही प्रवाशांनी सांगितले. याबाबत मध्ये रेल्वेचे मुख्य जनसंपर्क अधिकारी सुनील उदासी म्हणाले, आमच्या वरिष्ठ अधिकाऱ्यांकडून या रेल्वेची तपासणी करण्यात आली होती. मात्र त्यामध्ये या तक्रारी दिसून आल्या नाहीत. पण प्रवाशांच्या तक्रारी असतील तर त्याची योग्य ती दखल घेऊन सुधारणा करण्यात येतील. आम्ही प्रवाशांकडून येणाऱ्या प्रतिक्रीया आणि सूचना यांचे कायम स्वागत आहे असेही ते म्हणाले. देशातील ठराविक रेल्वेंमध्ये सुधारणा करण्यासाठी ४०० कोटींचा निधी मंजूर करण्यात आला असून एका रेल्वेसाठी ६० लाख निधी देण्यात आला आहे. या योजनेत पुणे-मुंबई मार्गावरील प्रगती एक्सप्रेस ही एकमेव गाडी होती.