सातारा जिल्ह्यातील फलटण येथे चालकाचे कारवरील नियंत्रण सुटल्याने कार झाडावर आदळल्याची घटना शुक्रवारी घडली. या भीषण अपघातात पाच जणांचा मृत्यू झाला असून मृतांमध्ये तीन लहान मुले आणि दोन महिलांचा समावेश आहे. पुणे- पंढरपूर मार्गावर बरड गावाजवळ शुक्रवारी दुपारी कार झाडावर आदळली. चालकाचे नियंत्रण सुटल्याने ही घटना घडली. ही कार सोलापूरहून पुण्याच्या दिशेने जात होती. कारमधून ९ जण प्रवास करत होते. ही धडक इतकी जोरदार होती की, गाडीचे इंजिन ड्रायव्हरसीटपर्यंत मागे आले होते. या अपघातामध्ये पाच जणांचा घटनास्थळीच मृत्यू झाला. यामध्ये ३ अल्पवयीन मुले आणि २ महिलांचा समावेश आहे. तसेच ४ जण या अपघातात जखमी झाले आहेत. जखमींना तत्काळ फलटण येथील रूग्णालयात दाखल करण्यात आले आहे.