वयाच्या १८ व्या वर्षी निवडणुकीचा हक्क का नको?

लातूर : युवकांच्या खांद्यावर देश आहे. जगातील सर्वात मोठा युवकांचे प्रतिनिधित्व करणारा देश म्हणून आपल्या देशाचे नाव घेतले जाते. १८ वर्षांच्या मुलीला लग्न करता येते. २१ वर्षांच्या मुलाला लग्न करता येते, मतदानाचा अधिकार आहे. मग निवडणूक लढवण्याची संधी का नाही ? जगात अनेक देशात १८ वर्षांच्या तरुणांना निवडणूक लढवण्याची संधी आहे. आपल्या देशात ती का मिळत नाही, असा थेट सवाल शिवसेनेचे युवानेते आदित्य ठाकरे यांनी लातूर येथील ‘आदित्य संवाद’ कार्यक्रमात उपस्थित केला.

लातुरात जनआशीर्वाद यात्रेनिमित्त गुरुवारी आदित्य ठाकरे आले होते. या प्रसंगी दयानंद शिक्षणसंस्थेच्या सभागृहात तरुणाईशी त्यांनी थेट संवाद साधला. या वेळी मुला-मुलींनी अनेक प्रश्न विचारले. लातूर जिल्हय़ातील आरसखेडा येथील वैष्णवी सूर्यवंशी या मुलीने, मुलीचे वय झाले की अजूनही केवळ तिच्या लग्नाचा विचार कुटुंबात केला जातो, त्यासाठी कर्जही काढले जाते. तिला पुढे शिकायचे आहे की नाही याचा विचार होत नाही. शिक्षणासाठी कर्ज का काढले जात नाही, असा सवाल केला तेव्हा हा अतिशय गंभीर प्रश्न असून शिक्षण हा मुलीचा जन्मसिद्ध हक्क आहे. तो तिला मिळायला हवा यासाठी प्रबोधन केले पाहिजे. तिला सर्व प्रकारचे संरक्षणही मिळायला हवे, असे ठाकरे म्हणाले.

वैभव शिंदे व ज्ञानेश्वर सूर्यवंशी या विद्यार्थ्यांनी पाऊस पडत नाही, शेतकरी आत्महत्या वाढत आहेत. यासंबंधी आपल्याकडे काय उपाययोजना आहेत, असा थेट सवाल केला तेव्हा २०१२ पासून आपल्याकडे दुष्काळ आहे. ज्या भागात पाऊस अधिक पडतो त्या भागातील पाणी नद्याजोड प्रकल्प व विविध उपाययोजनांद्वारे वळवले पाहिजे. उपलब्ध पाण्याचा प्रत्येक शेतकरी योग्य वापर कसा करतील यासाठीचे प्रशिक्षण दिले पाहिजे, असे ते म्हणाले.

शिवसेनेच्यावतीने आत्महत्याग्रस्त कुटुंबांना सर्व प्रकारची मदत दिली जात आहे. शेतकऱ्याच्या पीकविम्यासाठी मुंबईकरांनी मोर्चा काढला, ही मुंबईच्या इतिहासातील वेगळी घटना असल्याचे त्यांनी सांगितले. राजकीय मेगाभरती व रोजगारसाठीची मेगाभरती यातील आपले प्राधान्य कशाला, या प्रश्नाला उत्तर देताना ठाकरेंनी ‘महाराष्ट्रा’ला असे उत्तर देऊन आपली सोडवणूक करवून घेतली. औसा तालुक्यातील काजळे चिंचोली येथील केदार मिटकरी याने ग्रामीण भागातील हिमादास हिला संधी मिळाल्यानंतर तिने पाच सुवर्णपदके मिळवली. हिमा दाससारखे हजारो तरुण, तरुणी ग्रामीण भागात आहेत, त्यांना योग्य संधी मिळत नाही त्याबद्दल आपल्याकडे कोणत्या योजना आहेत , असा प्रश्न विचारला तेव्हा ग्रामीण भागात अशा संधी उपलब्ध करून देण्यासाठी राज्य सरकार व केंद्र सरकारकडे आपण पाठपुरावा करणार असल्याचे ते म्हणाले. महाविद्यालयात ईबीसीचे पैसे प्राप्त झाल्यानंतर ते पैसे विद्यार्थ्यांपर्यंत पोहोचत नाहीत, अशी खंत काही जणांनी व्यक्त केली. आकांक्षा कुलकर्णीने शहीद झालेल्या परिवारासाठी शासन कोणत्या सुविधा देते, असा प्रश्न उपस्थित केला तेव्हा शासकीय योजनांची तपशीलवार माहिती ठाकरे यांनी दिली व विविध स्वयंसेवी संस्थाही यासाठी काम करत असल्याचे ते म्हणाले.

रेणापूर तालुक्यातील खलंग्री उपसरपंच गजानन बोळंगे यांनी गरीब मुलांच्या शिक्षणासाठी आपण व्यक्तिगतरीत्या मदत करतो. शिवसेना याबाबतीत काही करते काय, असा प्रश्न विचारल्यानंतर ठाकरे यांनी व्यासपीठावर बोलवून त्या तरुणाचे अभिनंदन केले व यात शिवसेना आपले योगदान देईल, असे आश्वासित केले. या संवाद कार्यक्रमास तरुण, तरुणींची मोठी गर्दी होती. ठाकरे यांच्यासोबत उस्मानाबादचे खासदार ओम राजेनिंबाळकर, शिवसेनेचे जिल्हाप्रमुख संतोष सोमवंशी, नामदेव चाळक आदी उपस्थित होते.