शरद पवार आणि अजित पवारांमध्ये पुण्यात गुप्त बैठक? राजकीय चर्चांना उधाण

पुण्यातील चांदणी चौकातील उड्डाणपुलाचा उद्घाटन सोहळ्यासाठी केंद्रीय मंत्री नितीन गडकरी, उपमुख्यमंत्री देवेंद्र फडणवीस उपमुख्यमंत्री अजित पवार उपस्थित होते. तर, दुसरीकडे साखर उद्योगाच्या दृष्टीने महत्वाची संस्था असलेल्या वसंतदादा शुगर इन्स्टिट्यूटच्या बैठकीनिमित्त राष्ट्रवादी काँग्रेसचे अध्यक्ष शरद पवार, प्रदेशाध्यक्ष जयंत पाटील, माजी मंत्री राजेश टोपे पुण्यात होते.

या बैठकीनंतर पुण्यातील कोरेगाव पार्क येथील एका बड्या व्यावसायिकच्या घरी शरद पवार आणि अजित पवार दाखल झाले. या नेत्यांमध्ये दोन तास चर्चा झाल्याचं सांगितलं जात आहे. यावेळी जयंत पाटील हेही बैठकीला उपस्थित असल्याची चर्चा आहे. या भेटीचं कारण अद्याप समोर आलं नाही.

दरम्यान, मंत्रीपदाची शपथ घेतल्यानंतर अजित पवारांसह काही आमदारांनी शरद पवार यांची सलग दोन दिवस यशवंतराव चव्हाण सेंटर येथे भेट घेतली होती. शरद पवारांचा आशीर्वाद घेण्यासाठी ही भेट असल्याचं प्रफुल्ल पटेल यांनी सांगितलं होतं.