अजित पवारांच्या राजीनाम्याबद्दल पार्थ पवारही अनभिज्ञ

पवारांच्या राजीनाम्यानंतर राजकीय वर्तुळात चर्चांना उधाण आलेलं आहे. महत्वाची गोष्ट म्हणजे राष्ट्रवादी काँग्रेसमधल्या प्रमुख नेत्यांनाही पवारांच्या राजीनाम्याबद्दल काहीही माहिती नसल्याने आश्चर्य व्यक्त केलं जात आहे. अजित पवार शुक्रवारी शरद पवारांसोबत ईडी कार्यालयात हजर राहण्यासाठी मुंबईत येणार होते. मात्र पुणे आणि बारामतीमध्ये पावसामुळे झालेल्या नुकसानाचं पाहणी करण्यासाठी पवारांनी मतदारसंघात राहण्याचं ठरवलं.

अजित पवार यांचं नाव शिखर बँक घोटाळा प्रकरणात पुढे आलं होतं. त्यांच्यासह ७० जणांची नावं २५ हजार कोटींच्या घोटाळ्यात समोर आली होती. ज्यामध्ये शरद पवार यांचंही नाव होतं. आज दिवसभर शरद पवार हे ईडीच्या कार्यालयात हजेरी लावणार ही बातमी चर्चेत होती. मात्र कायदा सुव्यवस्थेचं कारण सांगत शरद पवार यांनी ईडी कार्यालयात जाणार नसल्याचं स्पष्ट केलं. अजित पवार हे त्या शिखर बँकेच्या संचालक मंडळावर होते. या घोटाळ्यामध्ये शरद पवारांचा संबंध असू शकत नाही कारण ते ना संचालक होते, ना सभासद होते असे सर्वांनीच स्पष्ट केले होते. मात्र कुणीही अजित पवार यांच्यासंदर्भात स्पष्टीकरण दिले नव्हते. या पार्श्वभूमीवर अजित पवार यांच्या राजीनाम्यामुळे खळबळ उडाली आहे.