सांगली : नागरी वस्तीजवळ सहजासहजी दृष्टीस न पडणारा तिरंदाज पक्षी मिरजेत आढळला. ॲनिमल राहत व डब्ल्यूआरआरसी या संघटनेच्या कार्यकर्त्यांनी त्याला पकडून वन विभागाच्या मदतीने वैद्यकीय उपचार करून नैसर्गिक अधिवासात मुक्त केले.
मिरजेतील समीर शहा व साहिल शहा यांच्या अंगणातील झाडावरून एक पक्षी खाली पडला व जवळ गेले असता बदकासारखा तुरुतुरू पळू लागला. कुत्रे, मांजर त्याच्यावर हल्ला करतील या काळजीने त्यांनी त्यास पकडून त्यांच्या घरात सुरक्षित ठेवले. यानंतर ॲनिमल राहत व डब्ल्यूआरआरसी या संस्थेत फोन करून पक्षाविषयी माहिती दिली.
सदर पक्षी येथे सहसा न आढळणारा असून त्यास तिरंदाज, सर्पमान्या अशा नावाने ओळखले जाते. वनविभागाचे सचिन साळुंखे व ॲनिमल राहतचे किरण नाईक तिथे तत्काळ पोहोचले व पक्षी ताब्यात घेऊन मिरज पशुवैद्यकाकडे नेले. त्याची तपासणी केल्यानंतर तो पक्षी जखमी व आजारी नसून त्यास खाणे न मिळाल्यामुळे अशक्त झाल्याचे निदान डॉक्टरांनी केले. त्यानंतर त्यास वनविभागाच्या उपचार केंद्रात ठेवण्यात आले. या केंद्रात त्याला दोन दिवस मासे खाण्यास देण्यात आल्याने त्याच्या प्रकृतीत सुधारणा झाली. त्यानंतर त्यास डॉक्टरांच्या सल्ल्याने वनविभागाचे वनपरिक्षेत्र अधिकारी श्री सोनवडेकर तसेच राहतचे डॉक्टर राकेश चितोरा, डॉ. सतीश पांडे यांच्या मार्गदर्शनाखाली निसर्गात मुक्त करण्यात आले.
