संगमनेर : सहकार महर्षी भाऊसाहेब थोरात सहकारी साखर कारखान्याच्या अध्यक्षपदी अपेक्षेप्रमाणे माजी मंत्री तथा काँग्रेसचे ज्येष्ठ नेते बाळासाहेब थोरात तर उपाध्यक्षपदी ज्येष्ठ संचालक पांडुरंग घुले यांची आज बिनविरोध निवड झाली. अलीकडेच कारखान्याच्या संचालक मंडळाची निवडणूकही बिनविरोध झाली होती. त्यानंतर पदाधिकारी म्हणून कोणाची निवड होते याची उत्सुकता निर्माण झाली होती.
कारखान्याच्या अतिथीगृहात आज प्रादेशिक सहसंचालक संतोष बिडवाई यांच्या अध्यक्षतेखाली वरील निवडी झाल्या. अध्यक्षपदासाठी बाळासाहेब थोरात यांच्या नावाची सूचना संपतराव गोडगे यांनी मांडली, त्यास संतोष हासे यांनी अनुमोदन दिले. उपाध्यक्ष पदासाठी पांडुरंग घुले यांच्या नावाची सूचना विजय राहणे यांनी मांडली. विलास शिंदे यांनी त्यास अनुमोदन दिले. यावेळी सर्व नवनिर्वाचित संचालक मंडळ, कार्यकारी संचालक जगन्नाथ घुगरकर, प्रादेशिक कार्यालयाचे उमेश कुलकर्णी, प्रवीण चव्हाण आदी उपस्थित होते.
निवडीनंतर नवनिर्वाचित पदाधिकाऱ्यांचा सत्कार करण्यात आला. याप्रसंगी माजी आमदार डॉ. सुधीर तांबे, बाजीराव खेमनर, ॲड. माधवराव कानवडे, मावळते अध्यक्ष बाबासाहेब ओहोळ, दूध संघाचे अध्यक्ष रणजीतसिंह देशमुख, डॉ.जयश्री थोरात, लक्ष्मणराव कुटे, अमृतवाहिनी बँकेचे अध्यक्ष सुधाकर जोशी, बाजार समितीचे सभापती शंकरराव खेमनर, तालुका शेतकी संघाचे अध्यक्ष संपतराव डोंगरे आदीसह तालुक्यातील विविध संस्थांचे पदाधिकारी उपस्थित होते. यावेळी बोलताना माजी थोरात म्हणाले की, सहकार महर्षी भाऊसाहेब थोरात यांच्या शिस्त, काटकसर, पारदर्शकता या आदर्श तत्त्वावर व विचारांवर संगमनेरचा सहकार व कारखान्याचे काम सुरू आहे. सर्व निर्णय एकमताने आणि एक विचाराने घेतल्याने यशस्वी वाटचाल सुरू आहे. महाराष्ट्रातील सहकारी साखर कारखानदारीमध्ये अनेक अडचणी आहेत. खासगी साखर कारखान्यांच्या आव्हानामुळे स्पर्धा वाढली आहे. यापुढील काळातही यशस्वी वाटचाल आपल्या सर्वांना कायम ठेवायची आहे.
आपण तालुक्यात नेहमीच सुसंस्कृत राजकारण केले विरोधकांचाही कधी आपण व्यक्तीद्वेष केला नाही. मात्र आता काळजी करण्यासारखी परिस्थिती निर्माण झाली आहे. तालुक्यात दहशत वाढते की काय असा प्रश्न आहे. सर्वसामान्यांच्या जीवनावर काय परिणाम होईल याचा विचार करायला हवा. कुणाचीही गुलामगिरी स्वीकारता कामा नये. येणाऱ्या स्थानिक स्वराज्य संस्थांमध्ये कार्यकर्त्यांना मोठी संधी आहे. सर्वांनी आपसातील मतभेद विसरून एकजुटीने लढावे लागेल असेही ते म्हणाले. डॉ. तांबे, नवनिर्वाचित उपाध्यक्ष घुले, मावळते अध्यक्ष ओहोळ, यांचीही यावेळी भाषणे झाली.
जनतेच्या आशीर्वादाने व नेतृत्वाच्या विश्वासाने राज्यभरात महत्त्वाच्या पदांवर काम करण्याची संधी मिळाली. या पदांचा उपयोग तालुक्याच्या विकासासाठी केला. विधानसभेच्या निवडणुकीत अपघात झाला. परंतु यापुढे सर्वांनी एकजुटीने एकत्र येऊन काम करायचे आहे. पक्ष नेतृत्वाने विश्वास दाखवत काँग्रेसच्या राष्ट्रीय समितीमध्ये पहिल्या २१ जणांमध्ये आपला समावेश आहे. सध्या गुजरातची जबाबदारी आहे. हा सन्मान तालुक्याच्या जनतेचा असून यापुढेही सर्वांनी एकजुटीने काम करावे. माजी मंत्री बाळासाहेब थोरात अध्यक्ष, थोरात साखर कारखाना, संगमनेर
