‘ओंकार’ हत्तीवर सुतळी बॉम्बने हल्ला; प्राणीमित्रांमध्ये संताप, स्थलांतराची मागणी

गेल्या काही दिवसांपासून ओंकार हत्तीवरील हल्ल्याचे प्रकार समाजमाध्यमातून प्रसारित झाले आहेत. हे प्रकार तातडीने थांबवून ओंकार हत्तीला सुरक्षित ठिकाणी स्थलांतरित करण्याची मागणी केली जात आहे.

न्यायालयाच्या परवानगीनंतरच पकड मोहीम

मार्ले येथील शेतकऱ्यावर हल्ला करून त्याला ठार मारल्यानंतर वन विभागाने ‘ओंकार’ हत्तीला पकडण्याचा निर्णय घेतला होता. मात्र याविरोधात काही पर्यावरणवादी संघटनांनी उच्च न्यायालयात याचिका दाखल केली आणि मोहीम सध्या थांबविण्यात आली आहे. न्यायालयाची परवानगी घेण्यासाठी वस्तुस्थितीदर्शक अहवाल सादर केला जाईल. न्यायालयाच्या परवानगीनंतरच हत्ती पकडण्याची मोहीम सुरू केली जाईल, अशी माहिती वन विभागाच्या वरिष्ठ अधिकाऱ्यांनी दिली आहे.

हत्तीला त्रास देण्याचा प्रयत्न करणाऱ्यांची माहिती गोळा केली जात आहे. सर्व संबंधितांवर वन्यजीव संरक्षण कायद्यांतर्गत कारवाई करण्यात येईल.

• मिलीश शर्मा, उपवनसंरक्षक सिंधुदुर्ग.

हत्ती समूहात राहणारा प्राणी आहे. ओंकार हत्तीला समूहात सोडावे म्हणून मी केंद्र सरकारचे लक्ष वेधले होते. त्याच्यावर सुतळी बॉम्ब फेकण्याचा प्रकार चुकीचा आहे. ओंकार हत्ती लहान असून, तो भरकटलेल्या स्थितीत फिरतोय. त्याचे कुटुंब असेल त्या समूहात वन विभागाने त्याला सोडून देणे आवश्यक आहे.

• स्टॅलिन दयानंद, संचालक, वनशक्ती संस्था

कायदेशीर कारवाई

बागायतदारांनी नदीपात्रात पाण्याचे पंप बसवले होते. हत्ती तिकडे जाऊन नुकसान होऊ नये यासाठी त्याच्यावर सुतळी बॉम्ब फेकण्यात आल्याची प्राथमिक माहिती समोर आली आहे. वन विभागानेही या वृत्ताला दुजोरा दिला असून, हत्तीला त्रास देणाऱ्यांविरोधात कायदेशीर कारवाई करण्यात येणार असल्याचेही विभागाने स्पष्ट केले आहे.