धनगर आरक्षणाची मागणी करणाऱ्या याचिका न्यायालयाने फेटाळल्या, ‘धनगर’ आणि ‘धनगड’ एकच नसल्याचंही नोंदवलं निरीक्षण

गेल्या काही दिवसांपासून धनगर आरक्षण मिळावं म्हणून आंदोलनं आणि मोर्चे काढण्यात येत होते. मात्र उच्च न्यायालयाने धनगर समाजाला दिलासा दिलेला नाही. यासंदर्भातल्या सगळ्या याचिका फेटाळून लावल्या आहेत. धनगर समाजासाठी हा मोठा धक्का मानला जातो आहे. भटक्या विमुक्तांमधून अनुसूचित जमातींमध्ये समावेश होण्यासाठी ही मागणी केली जात होती. मात्र यासंदर्भातल्या याचिका फेटाळल्या आहेत. धनगर समाजाची मागणी मान्य करता येणार नाही असं उच्च न्यायालयाने म्हटलं आहे.

धनगर समाजाला एसटी म्हणजे अनुसूचित जमातींमधून आरक्षण मिळावं म्हणून अनेक वर्षांपासून आंदोलन सुरु आहे. गेल्या काही महिन्यांपासून आंदोलनाची तीव्रता वाढली होती. तसंच धनगर समाजाने या आरक्षणासाठी उच्च न्यायालयात धाव घेतली होती. मात्र न्यायमूर्ती गौतम पटेल आणि कमल खाटा यांनी धनगर आरक्षणाच्या सगळ्या याचिका फेटाळून लावल्या आहेत. सर्व याचिका फेटाळून लावण्यात आल्याने सर्वोच्च न्यायालयात दाद मागण्याचा पर्यायच आता धनगर समाजाकडे आहे.