पहाटेच्या शपथविधीबाबत जयंत पाटलांच्या खळबळजनक दाव्यावर चंद्रकांत पाटलांची प्रतिक्रिया, म्हणाले…

यावर प्रसारमाध्यमांना प्रतिक्रिया देताना चंद्रकांत पाटील म्हणाले की, “मला हे कळतच नाही की असे गौप्यस्फोट हे त्यावेळी का केले जात नाही. त्यामुळे अशा उशीरा सुचलेल्या शहाणपणाला, उशीरा मिळालेल्या माहितीला काहीच अर्थ नसतो. त्या एका अर्थाने संदर्भ नसलेल्या गोष्टी झालेल्या असतात. त्यामुळे जयंत पाटील काय म्हणाले, मग कोणी माहितीच्या अधिकारात काय म्हणालं याला फार काही अर्थ नाही.”

जयंत पाटील नेमकं काय म्हणाले? –

एबीपी माझा या वृत्तवाहिनीशी बोलत असताना जयंत पाटील म्हणाले की, “मला वाटत नाही की अजित पवार काही बोलले असतील. पण त्यावेळी राज्यात (२०१९ च्या विधानसभा निवडणुकीनंतर) राष्ट्रपती राजवट होती. राष्ट्रपती राजवट उठविण्याशिवाय काही पर्याय नव्हता. त्या अनुषंगाने केलेली ही एक खेळी असू शकते. त्यामुळे मला वाटत नाही की त्याला यापेक्षा जास्त काही महत्त्व आहे. त्यावेळी अजित पवार यांनी केलेल्या वक्तव्यांना आज महत्त्व नाही. त्यानंतर अजित पवार यांनी उद्धव ठाकरेंच्या नेतृत्वाखाली उपमुख्यमंत्री म्हणून काम केले. या काळात त्यांनी स्पष्टपणे कारभार केला. राष्ट्रवादी काँग्रेस पक्ष फुटला नाही. आता शिवसेनेचे आमदार फुटल्यामुळे सरकार कोसळले. पण राष्ट्रवादी काँग्रेसने उद्धव ठाकरेंना शेवटपर्यंत ठामपणे साथ दिली, हे नाकारता येणार नाही.”