चिपळूण येथे नागरिकांनी महामार्ग रोखला; उड्डाणपुलाचे काम करताना लोखंडी सळी विद्यार्थ्याच्या अंगावर पडल्याने जखमी

गेल्या काही वर्षापासून शहरातील बहादूरशेखनाका ते पाग बौद्धवाडी दरम्यानच्या उड्डाणपुलाचे काम सुरू आहे. या पुलाचे काम सुरवातीपासूनच या ना त्या कारणाने वादग्रस्त बनले आहे. दोन वर्षापुर्वी बहादूरशेखनाका येथे उड्डाणपुलाचे गर्डर कोसळल्याची गंभीर घटना घडली होती. त्यानंतर काही महिन्यातच पिलरवरून दोन कर्मचारी पडून गंभीर जखमी झाले होते. त्यापाठोपाठ सुरक्षितेसाठी पुलाच्या ठिकाणी लावलेली जाळी एका धावत्या ट्रकला अडकली होती. त्यामुळे देखील मोठा धोका निर्माण झाला होता. याशिवाय सातत्याने या परिसरात किरकोळ व मोठे अपघात होत आहेत.

या सर्व घटनांच्या पार्श्वभूमीवर संबंधीत ठेकेदार कंपनीला प्रशासनाकडून खबरदारीच्या सूचना सातत्याने केल्या जात होत्या. अशातच सोमवारी डीबीजे महाविद्यालयासमोर उड्डाणपुलावर पिलरसाठी टाकण्यात येत असलेली लोखंडी सळी अचानक खाली पडली. त्यात महाविद्यालयीन विद्यार्थी अथर्व शिंदे याच्यावर पडली. यात त्याच्या हाताला दुखापत झाली. त्याला तत्काळ उपचारासाठी खासगी रूग्णालयात नेण्यात आले. मात्र या प्रकारामुळे येथील वातावरण चांगलेच तापले होते. ठेकेदारावर गुन्हा दाखल करण्यासाठी रास्ता रोको करण्यात आला. पोलिसांच्या हस्तक्षेपा नंतर अर्ध्या तासाने महामार्गावरील वहातूक सुरळीत करण्यात आली.