चुकीच्या मार्गाने येणा-या लक्झरीची दुचाकीवरील दाम्पत्यास धडक

कराड-ढेबेवाडी मार्गावरील विंग फाटा (ता. कराड) येथे कराडकडे येणा-या खासगी लक्झरी बसने चुकीच्या मार्गाने येत मोटारसायकलवरील पती-पत्नीस धडक दिल्याने दोघांचा जागीच मृत्यू झाला. त्यामुळे संतप्त तरुणांनी लक्झरीची तोडफोड करीत पेटते बोळे टाकून ती पेटवून दिल्याची घटना आज रविवारी सकाळी साडेनऊच्या सुमारास घडली.
याबाबत कराड तालुका पोलीस व घटनास्थळावरून मिळालेली माहिती, अशी की शिवसागर खासगी लक्झरी बसने (क्रमांक एम ०४ जी ७३५३) राँग साईडने येत स्प्लेंडर (क्रमांक एम एच ५० बी ४७३५) या मोटारसायकलला जोराची धडक दिली. त्यात दादासो रघुनाथ शिंदे (वय ५०) व त्यांची पत्नी उज्ज्वला (वय ४५, दोघेही रा. केसे, ता. कराड) या दाम्पत्याचा जागीच मृत्यू झाला. या अपघातात रस्त्याकडेचे लोक नशिबाने बचावल्याचे तेथील नागरिकांनी सांगितले. दरम्यान, अपघात होताच, संतप्त नागरिकांनी लक्झरी बसचालक बाजीराव यशवंत माने (वय ५० रा. मानेवाडी, ता. पाटण) व वाहकास बेदम चोप दिला. या घटनेनंतर सुमारे अध्र्या तासाने पोलीस घटनास्थळी दाखल झाले. यावर चालक बाजीराव माने यास पोलिसांच्या हवाली करण्यात आले. तर घटनेचा पंचनामा सुरू असतानाच काही तरुणांनी लक्झरीच्या काचा फोडल्या आणि लक्झरीत पेटते बोळे टाकून ती पेटवून दिली. पोलिसांनी कराड पालिकेच्या अग्निशामक दलाचा पाणी बंब मागविला, मात्र अग्निशामक बंब पोहोचण्यापूर्वीच लक्झरी पूर्णत: जळून खाक झाली होती. या वेळी सातारा पोलिसांचे दंगा विरोधी पथक तैनात झाले होते. या अपघाताची नोंद कराड ग्रामीण पोलिसात झाली असून, अपघात आणि लक्झरी पेटवून दिल्याच्या प्रकाराचा पोलीस कसून तपास करीत आहेत.