पुणे -सोलापूर महामार्गावर काल रात्री घडलेल्या वेगवेगळ्या ठिकाणच्या तीन भीषण अपघातात आठ जणांचा मृत्यू झाला आहे. तर, तीन ते चार जण जखमी झाले असून त्यांच्यावर उपचार सुरू आहेत. यवत पोलीस स्टेशनच्या हद्दीत हे तीन अपघात घडले असल्याची माहिती समोर आली आहे. मध्यरात्रीच्या सुमारास हे अपघात घडले आहेत. रस्त्यांवरील खड्ड्यांसह चालकाची बेफीकीरी अपघातास कारणीभूत असल्याचं समोर येत आहे. महामार्गावरील वाखीरी येथे पायी चाललेल्या एक व्यक्तीस अज्ञात वाहनाने मागून धडक दिल्याने त्याचा जागीच मृत्यू झाला. तर दौंड तालुक्यातील कासुर्डा येथे रस्त्यात उभ्या असलेल्या कंटेनरला कारची जोरात धडक बसल्याने कारमधील पाचही जणांचा मृत्यू झाला. तिसरा अपघातही दौड तालुक्यात झाला. येथील सहजपूर येथे या ठिकाणी रस्त्यावरील खड्ड्यात कंटनेरचे चाक अडकून कंटनेर उलटले व या कंटनेरला विरुद्ध दिशेने येणाऱ्या कार धडकल्या. यामध्ये एकाचा जागीच तर अन्य एका जखमीचा रुग्णालयात उपचारादरम्यान मृत्यू झाला.
