वंचित बहुजन आघाडीचे प्रमुख प्रकाश आंबेडकर यांच्या घराबाहेर पोलीस बंदोबस्त वाढवण्यात आल्याच्या वृत्ताबाबात अखेर अकोला पोलिसांनी स्पष्टीकरण दिले आहे. आगामी सण उत्सव होळी, धुलीवंदन ,श्री शिवाजी महाराज जयंती व येणारी लोकसभा निवडणूक २०१९ या पार्श्वभूमीवर दंगा नियंत्रण उपाययोजना अंतर्गत रंगीत तालीम व कर्मचाऱ्यांचे पथसंचलन घेण्याते आल्याचे पोलिसांनी स्पष्ट केले आहे.
प्रकाश आंबेडकर समर्थकांचे म्हणणे काय होते ?
अकोला येथे प्रकाश आंबेडकर यांचे निवासस्थान असून त्यांच्या यशवंत या निवासस्थानी शनिवारी सकाळी पोलिसांचा फौजफाटा होता. यावरुन प्रकाश आंबेडकर यांच्या समर्थकांमध्ये संभ्रम निर्माण झाला. बहजुन वंचित आघाडीचे प्रवक्ते राजेंद्र पातोडे यांच्या नावाने सोशल मीडियावर मेसेजही फिरत होते. “अकोल्यात बाळासाहेब आंबेडकर ह्यांचे घरापुढे अचानक लावलेला पोलिसांचा फौजफाटा आणि शीघ्रकृती दल हा रंगीत तालमीचा भाग आहे असे काही पत्रकार मंडळी सांगत आहेत. प्रकाश आंबेडकर यांच्या घरासमोर अशापद्धतीने कधीही रंगीत तालीम झालेली नाही, थेट घरापुढे पोलीस आणि शीघ्रकृती दलाच्या रांगा लावणे आणि त्याबाबत काहीही सूचना देण्यात आल्या नाहीत. त्या मुळे प्रचंड गोंधळ निर्माण झाला आहे. वंचित आघाडीच्या उमेदवारांची शुक्रवारी यादी जाहीर होणे आणि शनिवारी अचानक पोलीस आणि विशेष दल आणले जाणे ह्याबाबत पोलीस विभागाचे वतीने तात्काळ खुलासा आवश्यक आहे”, अशी मागणी केली जात होती.
पोलिसांचे म्हणणे काय ?
सोशल मीडियावरुन प्रकाश आंबेडकर यांच्या घराबाहेरील पोलीस बंदोबस्ताबाबतचा मेसेज व्हायरल झाला आणि याबाबत पोलिसांवर प्रश्नचिन्ह उपस्थित केले जात होते. अखेर सिव्हिल लाइन पोलीस ठाण्याने प्रेस नोट जारी केली आहे. यात म्हटले आहे की, शनिवार दिनांक १६ मार्च २०१९ रोजी ११.०० ते १२.३० वा पोलिस स्टेशन सिव्हिल लाइन पोलीस ठाण्याच्या हद्दीत आगामी सण उत्सव होळी, धुलीवंदन ,श्री शिवाजी महाराज जयंती व येणारी लोकसभा निवडणूक २०१९ संबंधांने दंगा काबू योजना रंगीत तालीम व कर्मचाऱ्यांचे पायदळ पथ संचलन घेण्यात आले .सदर संचलनाची सुरुवात कृषीनगर ,पोद्दार स्कूल ,वृंदावन नगर, जठारपेठ ,लहान ऊमरी ,रेल्वे ब्रिज ,मोठी उमरी शिवाजी पुतळ्यापर्यंत प्रभावी पायदळ पेट्रोलिंग करून समाप्त करण्यात. आले यामध्ये पोलीस निरीक्षक विनोद ठाकरे आणि ५१ कर्मचारी , RCP ९० CRPF आणि एक पोलीस निरीक्षक व ५९ कर्मचारी तसेच होमगार्ड असे एकूण ४ अधिकारी व २०० कर्मचारी यात सहभागी झाले होते, असे पोलिसांनी प्रसिद्धीपत्रकात म्हटले आहे. सदर पथसंचलनाचा सविस्तर अहवाल पाठवण्याची तजवीज ठेवली आहे. सदरचे पथसंचलन दंगा काबू योजना ही कोण्या व्यक्तीविरोधात नसून. आगामी सण उत्सव व येणारी निवडणूक संबंधाने पोलिसांनी केलेली नियमित कारवाई आहे .पथसंचलन हे पोलिस खात्यातील दैनंदिन काम असून त्याबाबत कुणीही गैरसमज करून घेऊ नये, असे पोलिसांनी म्हटले आहे.
