नगरमध्ये राष्ट्रवादीच्या पदाधिकाऱ्यासह पोलिसाला लाच घेतल्याबद्दल अटक

अशोक रामचंद्र गायकवाड (वय ७१, बिशप लॉइड कॉलनी, सावेडी अहिल्यानगर) व सहायक पोलीस उपनिरीक्षक राजेंद्र प्रभाकर गर्गे (वय ५७, रा. समर्थनगर, सावेडी, अहिल्यानगर) या दोघांना अटक करण्यात आली व दोघांना पोलीस कोठडीत ठेवण्याचा आदेश देण्यात आला आहे. अशोक गायकवाड यांनी पूर्वी आरपीआय (आठवले गट) जिल्हाध्यक्ष, प्रदेश सरचिटणीस म्हणून काम पाहिले आहे त्यानंतर त्यांनी स्वतंत्र राजकीय पक्षाची नोंदणी केली होती. त्यानंतर त्यांनी एकत्रित शिवसेनेत प्रवेश केला व नंतर विधानसभा निवडणुकीपूर्वी त्यांनी राष्ट्रवादी काँग्रेसमध्ये (अजित पवार गट) प्रवेश केला होता.

सहायक पोलीस उपनिरीक्षक राजेंद्र गर्गे शहरातील कोतवाली पोलीस ठाण्यात, गुप्तवार्ता शाखेत काम करतात. दोन महिन्यांनी ते निवृत्त होणार होते. या दोघांविरुद्ध शहरातील तोफखाना पोलीस ठाण्यात गुन्हा दाखल करण्यात आला आहे. या प्रकरणात सहायक पोलीस निरीक्षक कुणाल सपकाळे हेही वादाच्या भोवऱ्यात सापडले आहेत.

यातील तक्रारदाराच्या नातेवाईकाविरुद्ध गांजा आढळल्या प्रकरणी, कोतवाली पोलीस ठाण्यात गुन्हा दाखल आहे. या गुन्ह्याचा तपास सहायक पोलीस निरीक्षक कुणाल सपकाळे यांच्याकडे आहे. या नातेवाईकाने तक्रारदाराच्या ऑनलाईन बँक खात्याचा वापर केलेला आहे. त्यातूनच या तक्रारदाराला गुन्ह्याचे तपासी अधिकारी सहायक पोलीस निरीक्षक सपकाळे यांनी नोटीस बजावून सोडून दिले होते. नंतर या गुन्ह्यात आरोपी करण्याऐवजी साक्षीदार करण्यासाठी गायकवाड यांनी ५ लाख रुपयांच्या लाचेची मागणी केली. नंतर तडजोडीअंती १ लाख ५० हजार रुपयांची मागणी झाली.

दीड लाखाची रक्कम बिशप कॉलनी येथे स्वीकारताना अशोक गायकवाड यांना व नंतर सहायक उपनिरीक्षक राजेंद्र गायकवाड या दोघांना लाचलुचपत प्रतिबंधक विभागाच्या नाशिक पथकाने अटक केली. या दोघांनाही न्यायालयाने एक दिवस पोलीस कोठडीत ठेवण्याचा आदेश दिल्याची माहिती जिल्हा सरकारी वकील सतीश पाटील यांनी दिली.

गुन्ह्याचा अधिक तपास लाचलुचपत प्रतिबंधक विभागाच्या नगर पथकाचे पोलीस उपअधीक्षक अजित त्रिपूटे करत आहेत. नाशिक पथकाच्या पोलीस निरीक्षक नेहा तुषार सूर्यवंशी यांच्या मार्गदर्शनाखाली लाचेचा सापळा रचण्यात आला. त्यामध्ये अंमलदार विनोद चौधरी, विनोद पवार, अनिल गांगुर्डे यांनी सहभाग घेतला.