सांगली: जमीन नोंदीसाठी १० हजाराची लाच घेताना तलाठ्याला अटक

सांगली : चुलत्या-पुतण्यांनी आपसात खरेदी केलेल्या जमिनीची नोंद करुन सातबारा उतारा देण्यासाठी दहा हजाराची लाच घेताना तडसर (ता.कडेगाव) येथील तलाठी वैभव तारळेकर याला गुरुवारी अटक करण्यात आली. तक्रारदार व पुतण्या यांनी एकमेकांस विक्री केलेल्या शेतजमिनीची ७/१२ सदरी नोंद घेवून ७/१२ उतारा देणेकरीता तलाठी तडसरचे तलाठी वैभव सुभाष तारळेकर यांनी तक्रारदार यांचेकडे १० हजार रुपये लाच मागणी केली होती. तक्रारदार यांनी दिलेल्या तक्रारीनुसार पडताळणी केली असता लाचेची मागणी केल्याचे निष्पन्न झाले. गुरुवारी कडेगाव तडसर रोडलगत असले कृष्णा अपार्टमेंट या ठिकाणी सापळा लावला असता तलाठी श्री. तारळेकर, यांना १० हजार रूपये लाच रक्कम स्वीकारत असताना रंगेहात पकडण्यात आले आहे.