निलंबित पोलिसाबरोबर न्यायाधीशांची धुळवड? संतोष देशमुख हत्या प्रकरणात आणखी एक आरोप

बीड जिल्ह्यातील मस्साजोगचे सरपंच संतोष देशमुख यांच्या हत्येच्या तपासात कसूर केल्याप्रकरणी निलंबित करण्यात आलेल्या पोलीस अधिकाऱ्याची न्यायाधीशाबरोबर धुळवड खेळतानाची छायाचित्रे दमानिया यांनी ‘एक्स’वरून प्रसारित केली. ‘छायाचित्राची खात्री करून घ्यावी’ असे सांगतानाच दमानिया यांनी न्यायाधीशांच्या आचारसंहितेवर प्रश्नचिन्ह उपस्थित केले आहे. ‘या छायाचित्रातील व्यक्ती जर एकत्र दिसत असतील तर न्यायालयीन वर्तन नियमांचा भंग होत असल्याचे माझे मत आहे,’ असे त्यांनी ‘लोकसत्ता’शी बोलताना सांगितले. ‘लोकसत्ता’ या छायाचित्रांतील व्यक्ती वा तारीख यांची पुष्टी करत नाही.

दरम्यान, या छायाचित्रात दिसणाऱ्या एका अधिकाऱ्याशी संपर्क साधला असता ते म्हणाले, ‘आम्ही ज्या भागात राहतो, त्या भागात तीन न्यायाधीश राहतात. होळीनिमित्ताने केवळ आम्हीच जमलो होतो असे नाही तर २५ हून अधिक जण तेथे होते. मात्र काही जणांचे छायाचित्र समाजमाध्यमांवर आले आहे. आम्हाला व्यक्तिगत आयुष्य आहे की नाही, असा प्रश्न पडतो.’