वाई: सलग सुट्ट्यांमुळे महाबळेश्वर पाचगणी गिरीस्थानावर पर्यटकांची मोठी गर्दी झाली आहे.एकीकडे एन उन्हाळ्यात पाऊस, धुके,थंडी,ऊन ढगाळ वातावरण असे वेगळे पण आल्हाददायक वातावरण पर्यटक अनुभवत आहेत. गिरिस्थळांवर शुक्रवारी दुपार नंतर पर्यटकांची गर्दी वाढू लागली .आज शनिवारी सकाळपासून वाहनांच्या आणि पर्यटकांच्या गर्दीने महाबळेश्वर पाचगणी फुलून गेले. सलग आलेल्या सुट्ट्यांमुळे पर्यटकांची रेलचेल आहे.
मागील दोन-तीन महिन्यांच्या परीक्षा काळानंतर पहिल्यांदाच पर्यटक या गिरीस्थळी येत असल्यामुळे स्थानिक व्यावसायिक, हॉटेल चालक बंगले चालक पर्यटकांचे स्वागत करत आहेत.सलग सुट्ट्या अन महाबळेश्वर हे जणू समीकरणच झाले आहे. गुड फ्रायडे सह सलग शनिवार,रविवार अश्या लागून आलेल्या तीन दिवस सुट्ट्यांमुळे महाबळेश्वर पर्यटकांसाठी पर्यटकांची गर्दी आहे येथील बदललेल्या वातावरणच पर्यटक आनंद लुटताना दिसत आहेत.
महाबळेश्वर पर्यटन स्थळाचा मुख्य आकर्षण वेण्णालेक नौकाविहारासाठी मोठी गर्दी केली आहे. नौकाविहार सह चौपाटीवर मका कणीस मका फ्रँकी अश्या गरमागरम पदार्थांवर ताव मारण्यासोबतच आलेदार चहा भेळ पाणीपुरी तसेच आईसगोला स्ट्रॉबेरी विथ क्रीम सारख्या थंडगार पदार्थांची चव चाखताना दिसत आहेत. हौशी पर्यटक वेण्णालेकवर घोडेसवारीचा आनंद लुटताना दिसत आहेत. बालचमूसाठी विविध गेम्स ची धूम आहे. येथील प्रसिद्ध केट्स पॉईंट, महाबळेश्वरची शान असलेला ऑर्थरसीट पॉईंट, शिवरायांच्या पराक्रमाची साक्ष देणारे किल्ले प्रतापगड, श्री क्षेत्र महाबळेश्वर मंदिर, निसर्गाने मुक्त हस्ते उधळण केलेला लॉडवीक पॉइंट शहरानजीकचा सूर्योदयासाठीचा प्रसिद्ध विल्सन पॉइंट, सूर्यास्तासाठी प्रसिद्ध मुंबई पॉइंटसह अश्या पर्यटनस्थळांवर पर्यटकाना फेरफटका मारण्या सोबतच येथील निसर्गसौंदर्याचा मनमुराद आनंद लुटताना पाहावयास मिळत आहेत.
महाबळेश्वर मुख्य बाजारपेठेत देखील सायंकाळी पर्यटकांची खरेदीसाठी गर्दी होत असून बाजारपेठेतील प्रसिद्ध आकर्षक अशी लाकडी काठी,विविध आकर्षक वस्तू,प्रसिद्ध चप्पल खरेदीसह चणा चिक्की फज अश्या महाबळेश्वरी पदार्थ खरेदीसाठी पर्यटकांचा कल असल्याचे पाहावयास मिळत आहे . पर्यटकांना पर्यटनाचा आनंद मनमुराद घेता यावा यासाठी महाबळेश्वर पाचगणी पालिका प्रशासन सज्ज आहे. वाहतूक कोंडी टाळण्याचा प्रयत्न करत आहेत.
