सातारा : निवृत्तीचा क्षण अनेकांसाठी भावुक असतो मात्र फलटण पालिकेतील सफाई कामगार महिला माया काकडे यांच्यासाठी तो केवळ भावूकच नाहीतर संस्मरणीय ठरला. निवृत्तीच्या दिवशी आपल्या या सहकाऱ्यास मुख्याधिकारी निखिल मोरे यांनी निरोपाच्या सोहळ्यावेळी चक्क स्वतःच्या खुर्चीवर बसवत त्यांना तो सर्वोच्च मान दिला. त्यांच्या या कृतीने केवळ काकडे याच नाहीतर सगळाच कर्मचारी वर्ग भारवून गेला.
पालिकेतील सफाई कामगार म्हटले, की शहर जागे होण्यापूर्वी खूप कष्ट आणि वेदना सहन करत स्वच्छता ठरलेलीच असते. हे काम करणाऱ्या व्यक्तींनाही समाज वेगळ्या नजरेने काही वेळा पाहत असतो, तर अनेकदा त्यांचा सन्मानही होतो. फलटण आरोग्य विभागात कार्यरत असलेल्या माया काकडे २२ वर्षांच्या प्रदीर्घ सेवेनंतर निवृत्त झाल्या. त्यांच्या निरोप समारंभासाठी त्या आपल्या कुटुंबासह मुख्याधिकारी निखिल मोरे यांच्या दालनात आल्या होत्या. त्या वेळी मुख्याधिकारी निखिल मोरे यांनी एक अभूतपूर्व निर्णय घेतला. त्यांनी माया काकडे यांना हा निरोपाचा सोहळा होईपर्यंत स्वतःची खुर्ची देऊन मानाचे आसन दिले. या अनोख्या सन्मानाने मुख्याधिकाऱ्यांच्या खुर्चीवर बसलेल्या माया काकडे यांच्या डोळ्यांत आनंदाश्रू तरळले.
आतापर्यंत फलटण पालिकेच्या इतिहासात कोणत्याही सफाई कर्मचाऱ्याचा अशा प्रकारे सन्मान झाला नव्हता. मुख्याधिकारी मोरे यांची ही कृती केवळ एका कर्मचाऱ्याचा सन्मान नसून, सर्व कामगार वर्गाप्रति असलेली कृतज्ञता, आदर आणि आपुलकीचे प्रतीक ठरली. या समारंभाला माया काकडे यांच्यासोबत त्यांचे कुटुंबीय उपस्थित होते. माया काकडे याही या सन्मानाने भावुक झाल्या. त्यांनी मुख्याधिकाऱ्यांना हात जोडून फलटण पालिकेप्रति ऋण व्यक्त केले.
सफाई कर्मचारी म्हणून काम करताना खूप कष्ट असतात. तरीही पूर्ण निष्ठेने कर्मचारी आपली सेवा बजावतात. २२ वर्षे सेवा पूर्ण करून निवृत्त होणाऱ्या कर्मचाऱ्याच्या कामाबद्दल कृतज्ञता व्यक्त करणे, हाच या कृती मागचा उद्देश होता. निखिल मोरे, मुख्याधिकारी, फलटण
