ग्रामविकास अधिकाऱ्यास झापण्याच्या वक्तव्यावरुन वाद पेटला

जिंतूर विधानसभा मतदारसंघातील बोरी या गावी घरकुल लाभार्थ्यांची सभा आयोजित करण्यात आली होती. यावेळी घरकुल लाभार्थ्यांना मंजुरी पत्र वितरित करण्यात आले. या सभेला तालुका व जिल्हा स्तरावरील अधिकारीही उपस्थित होते. जिल्हा परिषदेच्या मुख्य कार्यकारी अधिकारी नतीशा माथुर यांचीही कार्यक्रमाला उपस्थिती होती. या कार्यक्रमातील एक व्हिडिओ समाजमाध्यमांवर फिरला. त्यात एका ग्रामविकास अधिकाऱ्याला पालकमंत्री बोर्डीकर या झापत असल्याचे त्यातून दिसून येते. ‘तुला पगार कोण देते, यापुढे अशी चमचेगिरी चालणार नाही. तू गावात काय कारभार करतोस हे मला माहीत आहे. असाच जर वागलास तर कानाखाली वाजवीन. तुला आताच्या आता बडतर्फ करून टाकीन’, असे वक्तव्य श्रीमती बोर्डीकर यांनी केले.

हा व्हिडिओ राष्ट्रवादी शरदचंद्र पवार पक्षाचे नेते आमदार रोहित पवार यांनी आपल्या ‘एक्स’ अकाउंटवर पोस्ट केला आहे. सभागृहात रमी खेळणारे, पैशाच्या बॅगा भरणारे, डान्सबार चालवणारे या मंत्र्यांमध्ये आता थेट अधिकाऱ्यांच्या कानाखाली वाजवणाऱ्यांची भर पडली आहे असे पवारांनी आपल्या या मजकुरामध्ये नमूद केले. दरम्यान आपल्या वक्तव्याची मोडतोड करण्यात आली आहे. मागचे पुढचे संदर्भ न देता तो दाखवण्यात आला आहे. संबंधित ग्रामसेवक विधवा महिलांकडे पैसे मागून त्यांना ग्रामपंचायतीत लुडबुड करणाऱ्या एका स्थानिक कार्यकर्त्याकडे पाठवून त्यांचा छळ करत होता.

जनसामान्यांना त्रास देणारे कर्मचारी असतील तर त्यांच्याविरुद्ध संताप व्यक्त होणारच. महिला भगिनींच्या तळमळीतून माझे ते वक्तव्य आहे, असे स्पष्टीकरण पालकमंत्री बोर्डीकर यांनी दिले. त्यानंतर आमदार रोहित पवार यांच्यावरही त्यांनी टीका केली. अर्धवट चलचित्र टाकून रोहित पवार यांनी दिशाभूल केली आहे. पोलीस ठाण्यात जाऊन आमदारांशी नीट वाग असे पोलीस अधिकाऱ्यांना धमकावणाऱ्या रोहित पवारांनी आम्हाला शिकवू नये, असेही बोर्डीकर म्हणाल्या. यामुळे बोर्डीकर विरुद्ध पवार असा वाद वाढला आहे.