महाराष्ट्र नवनिर्माण सेनेचे प्रमुख राज ठाकरे आठ दिवसांच्या कोल्हापूर आणि कोकण दौऱ्यावर जाणार आहेत. याबाबत मनसेच्या अधिकृत ट्विटर हँडलवर याची घोषणा करत माहिती देण्यात आली आहे. यानुसार राज ठाकरे २९ नोव्हेंबरला आपल्या दौऱ्याला सुरुवात करतील. हा दौरा ६ डिसेंबरपर्यंत चालेल. मनसेने आपल्या ट्वीटमध्ये म्हटलं, "२९ नोव्हेंबर २०२२ ते ६ डिसेंबर २०२२ या दरम्यान राज ठाकरे कोल्हापूर आणि कोकण दौऱ्यावर येत आहेत." राज ठाकरे कधी कुठे जाणार? राज ठाकरेंच्या दौऱ्याला मंगळवारी (२९ नोव्हेंबर) सुरुवात होईल. ते सर्वात आधी मुंबईहून कोल्हापूरला रवाना होतील. त्यानंतर ते तेथून सावंतवाडीला जातील. २९ नोव्हेंबरला त्यांचा मुक्काम कुडाळ येथे असणार आहे. राज ठाकरेंचा हा दौरा ६ डिसेंबरला दिपोलीत संपणार आहे. हेही वाचा : राज ठाकरे, मुख्यमंत्री एकनाथ शिंदेंनी कौतुक केलेल्या चित्रपटाला संभाजीराजेंचा विरोध, म्हणाले, “त्यांना माझी…” एकूणच मनसेच्या या घोषणेवरून राज ठाकरे पक्ष बांधणीच्या कामासाठी सक्रीय झाल्याचं दिसत आहे. त्यामुळे या दौऱ्यामुळे मनसेला आगामी निवडणुकांमध्ये किती फायदा होतो हे येणाऱ्या काळातच पाहायला मिळेल.
