खिशात मोबाइलचा स्फोट झाल्याने एक जण जखमी झाला आहे. जळगावात ही घटना घडली आहे. दरम्यान मोबाइलचा हा स्फोट होण्यामागे कोणतंही तांत्रिक कारण नसून उन्हाचा वाढता पारा कारणीभूत असल्याचा अंदाज वर्तवला जात आहे. खिशातच स्फोट झाल्याने विकार शफुल्ला खान जखमी झाले असून त्यांना रुग्णालयात दाखल करण्यात आलं आहे.
४२ वर्षीय विकार शफुल्ला खान शनीपेठ भागातील काट्याफईल परिसरात राहतात. सकाळी कामानिमित्त घराबाहेर पडले असताना त्यांच्या खिशात असलेल्या मोबाइलचा स्फोट झाला. हा मोबाइल एमआय कंपनीचा होता. स्फोटामुळे त्यांची मांडी भाजली असून त्यांना खासगी रुग्णालयात उपचारासाठी दाखल करण्यात आलं आहे. स्फोटामागे वाढती उष्णता कारणीभूत असल्याचा अंदाज वर्तवला जात असला तरी नेमक्या कारणाचा शोध घेतला जात आहे.
