भिडेगुरूजी, शिवप्रतिष्ठानला संत ज्ञानेश्वर महाराजांच्या पालखीसमोर चालण्यास परवानगी नाही

परंपरागत पद्धतीने चालत आलेला दिंड्यांचा क्रम कायम राहवा असं मत ज्ञानेश्वर महाराज पालखी सोहळा प्रमुखांनी पुन्हा एकदा मांडलं. त्यानंतर पोलिसांनी भिडे गुरुजी आणि त्यांच्या कार्यकर्त्यांना पालखी सोहळ्याच्या पुढे चालता येणार नाही हे स्पष्ट केलं. त्यामुळे उद्या संभाजी भिडे गुरुजी आणि त्यांचे समर्थक पुण्यातील जंगली महाराज मंदिरात जमतील आणि सर्व पालख्या पुढं गेल्यावर सोहळ्यात सहभागी होऊन शिवाजी नगर चौक ते डेक्कनच्या संभाजी महाराज पुतळ्यापर्यंत चालत जातील.

यापूर्वी शिवप्रतिष्ठानचे कार्यकर्ते आषाढी वारीसाठी निघालेल्या पालखी सोहळ्यात सहभागी होत असत. वारकऱ्यांसोबत धारकरीही जात असत. मात्र दोन वर्षांपूर्वी ज्ञानेश्वर महाराजांची पालखी आणि तुकाराम महाराजांची पालखी यांच्या पालखी मार्गात वाद झाला होता. त्यावेळी शिवप्रतिष्ठानचे काही कार्यकर्ते दिंडीच्या पुढे येऊन मार्गक्रमण करू लागले. यावर दिंडीतील प्रमुखांनी आक्षेप घेतला. त्यामुळे गेल्या वर्षीपासून शिवप्रतिष्ठानच्या कार्यकर्त्यांना पालखी मार्गात येण्यास मज्जाव करण्यात आला. यावर्षीही हा विरोध कायम आहे.

दोन्ही पालख्यांचे पुण्यात आगमन झाल्यानंतर अखेरच्या दिंडी मागे संभाजी भिडे गुरुजी यांच्यासह आम्ही सहभागी होणार असल्याची माहिती शिव प्रतिष्ठान जिल्हा अध्यक्ष संजय जढर यांनी दिली आहे. आम्हाला पालखी सोहळ्यात सहभागी होण्यापासून परवनगी नाकारल्याच्या वृत्तामध्ये कोणत्याही प्रकारचे तथ्य नाही. गेल्या वर्षीप्रमाणे पालखी सोहळ्यात कोणत्याही प्रकारचे शास्त्र घेऊन सहभागी होऊ नका. अशा स्वरूपाची नोटीस पाठविण्यात आली आहे. पोलिसानी दिलेल्या आदेशाचे आम्ही पालन करणार असल्याचेही जढर म्हणाले.