धुळ्यात रीलबहाद्दर तरुणाला रील बनवणं पडलं महागात, पोलिसांनी ‘अशी’ घडवली अद्दल

धुळ्यात नेमकी काय घडली घटना?

धुळे शहरातील देवपूर बस स्थानक या ठिकाणी रविवारी एका तरुणाने मुलींची छेडछाड करण्याच्या उद्देशाने तयार केलेला एक रील व्हिडिओ सोशल मीडियावर पोस्ट केला. हा व्हिडीओ काही वेळातच चांगलाच व्हायरल झाला. या व्हिडीओत हा तरुण महाविद्यालयीन विद्यार्थिनींसमोर येऊन एका हिंदी गाण्यावर नृत्य करीत असल्याचे दिसून आले होते, त्यानंतर नेटकऱ्यानी या तरुणाचा हा व्हिडिओ सोशल मीडियावर व्हायरल करत याच्यावर कडक कारवाई करण्याची मागणी करण्यात केली होती.

पोलिसांनी नेमकं काय केलं?

ज्यानंतर धुळे पोलिसांनी या तरुणाचा शोध घेऊन एलसीबीच्या पथकाने नरडाणा गावातून या तरुणाला ताब्यात घेतले आहे. राज पवार असे या तरुणाचे नाव असून पोलिसांनी त्याला ताब्यात घेतल्यानंतर ज्या ठिकाणी त्याने हा व्हिडिओ तयार केला त्याच देवपूर बस स्थानक परिसरात नेऊन या विद्यार्थिनींसमोर त्याला पोलिसांनी चांगलीच अद्दल घडवली आहे. ज्या ठिकाणी मुलींची छेड काढण्याच्या उद्देशाने हा व्हिडिओ बनवला होता त्या ठिकाणी घेऊन जात सर्व लोकांसमोर त्याची परेड काढत त्याला या सर्व मुलींसमोर माफी मागायला सांगितले यावेळी एका तरुणीने या तरुणाच्या चांगल्या कानशीलात लगावली असल्याचे देखील यावेळी बघायला मिळाले.