अजित पवारांनी दिल्लीत घेतली अमित शाहांची भेट! पार्थ पवार प्रकरणी चर्चा? जवळच्या सहकाऱ्याने सांगितलं भेटीचं कारण

अमित शाह यांच्या निवासस्थानी दोन्ही नेत्यांमध्ये बराच वेळ चर्चा झाली. अजित पवार यांचे पुत्र पार्थ पवार हे त्यांच्या अमेडिया कंपनीने मुंढवा येथील जमिनीच्या खरेदीच्या व्यवहारामुळे अडचणीत आलेले असताना ही भेट झाली आहे. त्यामुळे पार्थ पवार यांना या प्रकरणातून वाचवण्यासाठी अजित पवार यांनी ही भेट घेतल्याची चर्चा राजकीय वर्तुळात रंगत होती. या जमीन व्यवहाराप्रकरणी नेमेल्या चौकशी समितीचा अहवाल लवकरच येणार आहे. त्यामुळे पार्थ व अजित पवार समर्थकांची धाकधुक वाढली आहे.

दुसऱ्या बाजूला महाराष्ट्रातील स्थानिक स्वराज्य संस्थांच्या निवडणुका तोंडावर असल्याने अजित पवार व अमित शाह भेटीने सर्वांच लक्ष वेधलं आहे. दरम्यान, या भेटीबाबत अजित पवारांचे सहकारी व राष्ट्रवादी काँग्रेस पार्टीचे खासदार प्रफुल्ल पटेल यांनी माहिती दिली आहे.

अजित पवार व अमित शाह भेटीचं कारण काय?

प्रफुल्ल पटेल यांनी काही वेळापूर्वी गोंदिया येथे प्रसारमाध्यमांशी बातचीत केली. यावेळी ते म्हणाले, “अजित पवार हे काल (१५ नोव्हेंबर) महाराष्ट्र भूषण पुरस्कार देण्यासाठी दिल्ली येथे गेले होते. त्याच्या आधी बिहारच्या विधानसभा निवडणुकीचा निकाल लागला. त्यामुळे अभिनंदन करण्यासाठी ते केंद्रीय गृहमंत्री अमित शाह यांना भेटले. यात दुसरी कोणतीही चर्चा झाली नाही, याविषयी मी माहिती घेतली आहे. पार्थ पवार यांच्या जमीन व्यवहारप्रकरणी चौकशी करण्यासाठी मुख्यमंत्री देवेंद्र फडणवीस यांनी समिती नेमली आहे. याबाबत पोलीसही चौकशी करत आहेत. याबाबतीत जे काही तथ्य आढळतील त्यानुसार कारवाई केली जाईल.