“नितीन देशमुखला शस्त्रक्रिया झालेल्या जागेवर पोलिसांनी मारहाण करून…” रोहित पवारांचा संताप; म्हणाले, “हातवारे करून आव्हाडांना…”

आपल्या कार्यकर्त्याला भेटण्यासाठी जितेंद्र आव्हाड गुरुवारी मध्यरात्री पोलीस सांगतील त्या ठाण्यांमध्ये जात होते. मात्र, पोलिसांकडून त्यांना पुरेशी माहिती मिळत नव्हती. त्यावेळी आमदार रोहित पवारही त्यांच्याबरोबर होते. पोलिसांकडून मिळणारी वागणूक पाहून आमदार पवारही संतापल्याचं पाहायला मिळालं. त्यानंतर त्यांनी समाजमाध्यमांवर आपली व्यथा मांडली.

आमदार रोहित पवारांनी मांडली व्यथा

आमदार रोहित पवार म्हणाले, “आमच्या पक्षाचे कार्यकर्ते नितीन देशमुख यांच्यावर विधान भवनात गुंडानी हल्ला केल्यावर मकोकाचे आरोप असलेल्या गुंडांना अटक करायचे सोडून नितीन देशमुखलाच अटक केली. दोन महिन्यापूर्वी शस्त्रक्रिया झालेल्या जागेवर मारहाण झाल्याने त्यांची विचारपूस करण्याच्या अनुषंगाने नितीन देशमुख यांच्या भेटीची आम्ही मागणी केली असता पोलिसांनी चार पाच वेगवेगळया पोलीस ठाण्यांच्या ३ ते ४ तास फेऱ्या मारायला लावत उडवाउडवीची उत्तरे दिली. तसेच जितेंद्र आव्हाडांना हातवारे करत अपमानस्पद वागणूक दिली.”

“पोलीस प्रशासन कायद्याने कारवाई करणार असेल तर सहकार्यच राहते. परंतु, काही पोलीस राजकीय आदेशाने वागणार असतील तर काय? दाद कुणाकडे मागायची? राजकीय आदेशाने वागणारे पोलीस लोकप्रतिनिधींना देखील जुमानत नसतील तर सर्वसामान्यांचे काय हाल होत असतील?”

सामान्यांनी पोलिसांकडून न्यायाची अपेक्षा करायची की नाही?

रोहित पवार म्हणाले, ज्या आजींची जमीन हडपली गेली त्या आजीला, ज्ञानेश्वरी मुंडे, देशमुख कुटुंब, सूर्यवंशी कुटुंब यासारख्या असंख्य घटना आहेत जिथे सत्ताधारी लोकांवर आरोप आहेत, त्यांनी न्यायाची अपेक्षा करायची की नाही?