जितेंद्र आव्हाड, सुप्रिया सुळेंचे ड्रग्स तस्करांशी संबंध? मनीषा कायंदेंनी दाखवले ‘ते’ फोटो; म्हणाल्या, “काचेच्या घरात…”

मनीषा कायंदे यांनी आज पत्रकार परिषद घेऊन जितेंद्र आव्हाडांचा संशयित ड्रग्स तस्करांशी संबंध असल्याचा मोठा दावा केला. तसंच, विविध संशयित ड्रग्स तस्करांसोबत असलेले आव्हांडांचे फोटोही माध्यमांना दाखवले. यावेळी त्यांनी सुप्रिया सुळे यांच्यावरही टीका केली. शानू पठाण, सलमान फाळके या ड्रग्स प्रकरणातील संशयित आरोपींची जितेंद्र आव्हाड आणि सुप्रिया सुळेंचा संबंध असल्याचं त्या म्हणाल्या.

मनीषा कायंदे म्हणाल्या की, काही दिवसांपूर्वी ललित पाटील याला ड्रग्स प्रकरणात अटक झाली. २०२० मध्ये तो शिवसेनेचा कार्यकर्ता होता आणि आताही असेल. अमली पदार्थ प्रकरणात सात ते आठ नावं समोर आली आहेत. यानंतर मोठं नाव समोर आलं ते कळवा मुंब्रा विभागातून सलमान फाळके याचं. त्याच्याकडे ५४ ग्रॅमच्यावर ड्रग्स सापडलं. त्याशिवाय अजूनही नावे समोर आलीत. शानू पठाण यांचंही नाव पुढे आलं. ड्रग्सप्रकरणी विरोधकांनी रान उठवायचा प्रयत्न केला. दादा भुसे, शंभूराज देसाई यांच्यावर बेछूट आरोप केले. परंतु, या आरोपांमध्ये कोणतेच धागेदोरे पोलिसांना सापडले नाहीत.”

“परंतु, ड्रग्स प्रकरणात अटक झालेली मंडळी कोणाजवळची आहेत, कोणाशी संबंधित आहेत, कोणाचं प्रोत्साहन, राजकीय पाठबळ आहे का? हे तपासायला हवं. यासाठी काही फोटो याठिकाणी दाखवते”, असं म्हणत मनीषा कायंदे यांनी सलमान फाळके, शानू पठाण (ठामपा विरोधी पक्षनेता) यांचे जितेंद्र आव्हाड आणि सुप्रिया सुळेंसोबतचे फोटो दाखवले. त्या पुढे म्हणाल्या की, “फोटोंमध्ये बरीचशी जवळकी दिसतेय. सुप्रिया सुळे खासदार आहेत. आमच्या सरकारवर त्या रोज उठून आरोप करतात. विश्वप्रवक्ते रोज सकाळी उठून बोलतच असतात. हे फोटो बोलके आहेत. तुम्ही स्वतः काचेच्या घरात राहता तेव्हा दुसऱ्यांच्या घरावर दगडं फेकणं कितपत योग्य आहे. यावर फोटोंबाबत उत्तर द्यावं. सुप्रिया सुळे खासदार आणि संसदरत्न आहेत, त्यांचेही ड्रग्स तस्करांसोबत फोटो आहेत. यावर जितेंद्र आव्हाड, सुप्रिया सुळेंनी उत्तरं द्यावीत. याचा खुलासा व्हायला हवा”, असं मनीषा कायंदे म्हणाल्या.

सलमान फाळके न्यायालयीन कोठडीत

वडाळागावातील छोट्या भाभीला एमडी ड्रग्ज‌चा ठाण्यातून पुरवठा करणाऱ्या सलमान शकील अहमद फाळके याला अटक करण्यात आली असून तो पाच दिवसांच्या न्यायालयीन कोठडीत आहे.अमली पदार्थ व्यवहारप्रकरणात तो चौधा संशयित आरोपी आहे.