साईबाबा साकारणारे अभिनेते सुधीर दळवी यांच्या उपचारार्थ शिर्डीकरांचा मदतीचा हात

साईबाबांची महती जगभर पसरवणारे, साईभक्त तथा ज्येष्ठ अभिनेते सुधीर दळवी यांची प्रकृती गंभीर आहे. सुधीर दळवी यांच्यावर मुंबईतील लीलावती रुग्णालयात उपचार सुरू आहेत. त्यांच्या उपचारासाठी मोठा खर्च होत असल्याने दळवी कुटुंब आर्थिक अडचणीत सापडले आहे. त्यामुळे दळवी कुटुंबीयांनी चाहत्यांना आर्थिक मदतीचे आवाहन केले आहे. या आवाहनाला साथ देत शिर्डी ग्रामस्थांनी ५ लाख रुपयांची मदत दिली तसेच साई संस्थानच्या कर्मचाऱी आपल्या अर्धा दिवसाचा पगार अभिनेते दळवी यांना मदत म्हणून देणार आहेत.

अभिनेते सुधीर दळवी यांच्या उपचारासाठी मोठा खर्च अपेक्षित आहे. या पार्श्वभूमीवर शिर्डी ग्रामस्थांनी मदत करण्याचा निर्धार केला. या संदर्भात काल, गुरूवारी रात्री शिर्डीत ग्रामस्थांची बैठक झाली. प्रमोद गोंदकर यांच्या पुढाकाराने समाज माध्यमावर साईंच्या रुपातील सुधीर दळवींना मदत आवाहन करताच, काही तासांतच गावभरातून लोकांनी प्रतिसाद दिला. यंदाच्या श्रीरामनवमी उत्सवाच्या लोकवर्गणीतील साडेचार लाख रुपये शिल्लक होते. त्यात अजून ५० हजार रुपये जमा करून ग्रामस्थांनी अभिनेते सुधीर दळवी यांना उपचारासाठी ५ लाखांची मदत देऊ केली. त्याचबरोबर साईबाबा संस्थानच्या कर्मचाऱ्यांनी आपल्या अर्ध्या दिवसाचा पगार मदत म्हणून देणार आहे. शिर्डीचे माजी नगराध्यक्ष कैलास कोते यांनी ही माहिती दिली.

ज्येष्ठ अभिनेते सुधीर दळवी यांच्या प्रकृतीबाबत माहिती मिळाल्यानंतर मुख्यमंत्री वैद्यकीय सहायता निधीतून ५ लाख रुपयांची आर्थिक मदत जाहीर करण्यात आल्याचे मुख्यमंत्री कार्यालयाकडून सांगण्यात आले. दळवी यांना विखे परिवाराच्या वतीने वैयक्तिकरित्या एक ते दीड लाख रुपयांची आर्थिक मदत दिली जाणार असल्याची माहिती माजी खासदार डॉ. सुजय विखे यांनी ‘लोकसत्ता’शी बोलताना दिली.

दळवींच्या प्रकृतीत मदत होण्यासाठी प्रार्थना

अभिनेते सुधीर दळवी यांनी आधारित, १९७७ साली प्रदर्शित झालेल्या शिर्डी के साईबाबा या चित्रपटात साईबाबांची भूमिका साकारून जगभर साईबाबांची महती पोहोचवली होती. त्यांच्या अभिनयामुळे शिर्डीचे नाव जागतिक स्तरावर पोहोचले. आता त्यांच्यावर उपचार सुरू असताना शिर्डीकरांनी आपल्या साईभक्त अभिनेत्यासाठी पुढाकार घेतला आहे. ही शिर्डीच्या भक्तीची खरी परंपरा आहे. सुधीर दळवी यांच्या प्रकृतीत लवकर सुधारणा व्हावी यासाठी शिर्डीतील ग्रामस्थ आणि साईभक्तांनी साईबाबांकडे प्रार्थना केली आहे. ज्या भक्तांना मदत करायची असेल त्यांनी यथाशक्ती मदत करावी. -कैलास कोते, माजी नगराध्यक्ष, शिर्डी

साई संस्थानकडून अजूनही घोषणा नाही.

सुधीर दळवींनी साईबाबा होऊन जगाला भक्तीचा संदेश दिला. त्यांना उपचारासाठी साईबाबा संस्थाननेही पुढे यावे अशी भक्तांची अपेक्षा आहे. शिर्डी ग्रामस्थांनी संस्थान प्रशासनाला विनंती केली की, साईभक्त दळवी यांच्या आरोग्य उपचारासाठी तातडीची आर्थिक मदत जाहीर करावी. हे केवळ एक कर्तव्य नव्हे, तर साईभक्तीची परंपरा जपण्याचे कार्य आहे. असेही गावातील ज्येष्ठ साईभक्तांनी सांगितले. या संदर्भात साईबाबा संस्थानने अद्यापपर्यंत भुमिका स्पष्ट केली नाही.