नारायण राणे फक्त कणकवलीपुरते उरलेत – विनायक राऊत

“कणकवलीत स्वाभिमान पक्षाचा फक्त एक आमदार आहे. तर रत्नागिरी-सिंधुदूर्ग लोकसभा मतदारसंघात शिवसेनेचे पाच आमदार आहेत. त्यामुळे ज्यांना नारायण राणे प्रभावी आणि जनाधार असलेले नेते वाटतात त्यांनी त्यांची परीक्षा घ्यावी,” असं विनायक राऊत यांनी म्हटलं आहे.

यावेळी त्यांनी नारायण राणे यांना खऱंच पक्षात घेणार आहेत की नाहीत हे भाजपाने एकदाचं काय ते स्पष्ट करावं असं सांगितलं आहे. “जिल्ह्यातील भाजपा नेत्यांचा नारायण राणे यांना पक्षात प्रवेश देण्यास विरोध असून त्याकडे दुर्लक्ष केलं जाऊ शकत नाही,” असंही त्यांनी म्हटलं आहे.

यावेळी विनायक राऊत यांनी राष्ट्रवादी काँग्रेसचे ज्येष्ठ नेते छगन भुजबळ यांच्या शिवसेना प्रवेशावर भाष्य करताना आता शिवसेनेची ताकद वाढत असल्याचं हे सुतोवाच असल्याचं सांगितलं. छगन भुजबळ यांच्या प्रवेशासंबंधीचा निर्णय शिवसेना पक्षप्रमुख उद्धव ठाकरे घेतील असंही त्यांनी यावेळी स्पष्ट केलं.