“उद्धव ठाकरेंना धडा शिकवायचा होता”, वक्तव्यावर सुधीर मुनगंटीवाराचं स्पष्टीकरण; म्हणाले, “अजितदादा स्वतःच…”

या वक्तव्यावर मुनगंटीवार यांनी नुकतंच स्पष्टीकरण दिलं आहे. मुनगंटीवार म्हणाले, २४ ऑक्टोबर २०१९ या दिवशी निवडणुकीचे निकाल येत होते. परंतु त्याच दिवशी उद्धव ठाकरे यांच्या मनात खुर्चीबद्दलचं प्रेम जागं झालं. सायंकाळी ४ वाजता त्यांनी पत्रकार परिषद घेतली. मुळात ही पत्रकार परिषद संयुक्त व्हायला पाहिजे होती. उद्धव ठाकरे यांनी देवेंद्र फडणवीस यांना बरोबर येऊन पत्रकार परिषद घेण्याऐवजी त्यांनी एकट्याने पत्रकार परिषद घेतली. त्यावेळी ठाकरे म्हणाले, आमच्यासहमोर सर्व पर्याय खुले आहेत. त्याच दिवशी उद्धव ठाकरे यांनी लोकशाहीची हत्या केली.

आमदार सुधीर मुनगंटीवार म्हणाले, उद्धव ठाकरे यांनी आमचा आणि मतदारांचा विश्वासघात केला. त्यानंतर भाजपाने, आमच्या नेत्यांनी अनेकदा उद्धव ठाकरे यांना समजावण्याचा प्रयत्न केला. आम्ही त्यांना म्हणालो तुम्ही आमच्यासोबत निवडून आला आहात. परंतु ते ऐकले नाहीत. सरकार स्थापन झाल्यावर नाराजी नाट्य होतं आणि अशा घटना घडतात. परंतु यावेळी त्याआधीच सगळं काही घडलं. बाळासाहेब ठाकरे यांनी आम्हाला जो युतीधर्म शिकवला आहे. तो उद्धव ठाकरे यांनी पाळला नाही.

हे ही वाचा >> “पहाटेचा शपथविधी योग्यच होता, कारण…”, शिंदे गटाच्या नेत्याचं मोठं विधान

वरिष्ठ भाजपा नेते सुधीर मुनगंटीवार म्हणाले, उद्धव ठाकरे यांनी विश्वासघातकी भूमिका घेतली. याचा आमच्या मनात राग होता. उद्धव ठाकरे यांना धडा शिकवण्याची तेव्हा संधी मिळाली. अजित पवार यांनी स्वतः स्थिर सरकारसाठी मी आपल्यासोबत येऊ शकतो असा भाव व्यक्त केला. तेव्हा भाजपाने विचार केला उद्धव ठाकरे यांना धडा शिकवणं आवश्यक आहे. अजित दादांनी स्वतः इच्छा प्रकट केली की स्थिर सरकार झालं पाहिजे. उद्धवजी यांची बेईमानी काही लोकशाहीला योग्य नाही. अशा बेईमानीला योग्य वेळी आपण उत्तर दिलं पाहिजे हा भाव त्यामागे (पहाटेच्या शपथविधीमागे) होता.