“…तर मी आमदारकीचा राजीनामा देतो”, ठाकरे गटाचे आमदार नितीन देशमुख यांचं विधान!

मी पोलिसांना मारहाण किंवा धक्काबुक्की केली असेल तर आमदारकीचा राजीनामा देईन, असं नितीन देशमुखांनी म्हटलं आहे. प्रसारमाध्यमांशी संवाद साधताना नितीन देशमुखांनी हे विधान केलं. यावेळी देशमुख म्हणाले, “मी दहा वर्षे जिल्हा परिषद सदस्य पदावर काम केलं आहे. ३५३ कलमाचा पोलिसांकडून कसा गैरवापर केला जातो, हे मला माहीत आहे. निश्चितपणे आम्ही पोलिसांचा आदर व सन्मान करतो. पण आम्ही साध्या अधिकाऱ्यासोबत कशाला वाद घालू… आमदाराचा वाद मुख्य सचिव किंवा मोठ्या अधिकाऱ्यांसोबत झाला, तर तो साहजिकच आहे. पण हे बिचारे तिथे ड्युटी करतात. त्यांच्याशी आम्ही कशाला वाद घालू…”

हेही वाचा- ठाकरे गटाचे आमदार नितीन देशमुख यांच्याकडून पोलिसांना मारहाण, सोशल मीडियावर VIDEO व्हायरल

“पण मुळात विरोधी पक्षनेते किंवा मंत्र्यांच्या बंगल्यावर जाण्यासाठी परवानगी कशाला हवी? मुंबईतही अधिवेशन भरतं. पण येथे मंत्री किंवा विरोधी पक्षनेत्याच्या बंगल्यावर जाण्यासाठी कसल्याही प्रकारची परवानगी किंवा पासेस मागितले जात नाहीत. पण नागपुरात आमच्या विरोधी पक्षनेत्याच्या बंगल्यावर जाण्यापासून आडवलं जातं. आम्ही आमच्या पक्ष प्रमुखांच्या बैठकीला चाललो असताना ते आम्हाला कसं काय आडवू शकतात. तिथे जो हा गैरप्रकार सुरू होता, याला आम्ही विरोध केला.

हेही वाचा- अनिल देशमुखांच्या सुटकेनंतर शरद पवारांची पहिली प्रतिक्रिया; म्हणाले, “PM मोदी आणि शाह यांना…”

तुम्ही पोलिसांना मारहाण केली का? असं विचारलं असता नितीन देशमुख म्हणाले, “मी जर पोलिसांना मारहाण किंवा धक्काबुक्की केली असेल तर मी माझ्या आमदारकीचा राजीनामा देतो. नाहीतर गृहमंत्री म्हणून देवेंद्र फडणवीसांनी एका आमदाराला न्याय द्यावा आणि त्या पोलिसाला निलंबित करावं,” अशी मागणी नितीन देशमुखांनी यावेळी केली.