ठाणे : दुचाकीवरील महिलांचा विनयभंग, ‘झोमॅटो’च्या दोघांना अटक

मिळालेल्या माहितीनुसार, छोटेलाल सोनी (३५, रा. कोपरी, ठाणे), गजानन शिंदे (२९, रा. कळवा, ठाणे) अशी आरोपींची नावे आहेत. घोडबंदर रोडवरील ब्रह्मांड सिग्नल परिसरात सोमवारी सायंकाळी पावणे सहा वाजण्याच्या सुमारास ही घटना घडली. राबोडी परिसरात राहणाऱ्या दोन मैत्रिणी वेदांत रुग्णालयात गेल्या होत्या. तेथून घरी परत येत असताना घोडबंदर रोडवरील ब्रह्मांड सिग्नलजवळ त्यांच्या मागून आलेल्या दुचाकीस्वारांनी त्यांना शिवीगाळ केली. महिलांनी याचा जाब विचारल्यानंतर मागे बसलेल्या आरोपीने एका महिलेचा विनयभंग केला आणि मारहाण करण्याचाही प्रयत्न केला. त्यावेळी तेथे उपस्थित वाहतूक पोलिसांनी आरोपींना रोखले आणि कापूरबावडी पोलिसांच्या ताब्यात दिले. या दोघांनाही न्यायालयीन कोठडीत ठेवण्याचे आदेश ठाणे न्यायालयाने दिले आहेत.