नगर : विविध सरकारी कार्यालयातून ‘एजंट’गिरी करणाऱ्या दोघांना नगरच्या लाचलुचपत प्रतिबंधक विभागाने शुक्रवारी राहुरीमध्ये ४० हजार रुपये स्वीकारताना पकडले. या दोघांनी नगरच्या जात पडताळणी कार्यालयातून दाव्याचा निकाल तक्रारदाराच्या बाजूने लावून देण्याचे आमिष दाखवले होते. हबीब बाबूभाई सय्यद (५२) व शकील अब्बास पठाण (४३ दोघेही खासगी एजंट, रा. महादेववाडी, सडे, राहुरी) अशी अटक केलेल्या दोघांची नावे आहेत. या दोघांविरुद्ध राहुरी पोलीस ठाण्यात गुन्हा दाखल करण्यात आला असून दोघांना आज न्यायालयापुढे हजर केले जाणार आहे. राहुरीतील तिघांनी श्रीरामपूरच्या प्रांताधिकाऱ्यांकडून जातीचे दाखले मिळवले होते. हे जातीचे दाखले खोटे असल्याने त्यांना जात पडताळणी प्रमाणपत्र देऊ नये, असा दावा संगमनेरमधील एकाने नगरच्या कार्यालयाकडे केला होता. या दाव्याचा निकाल तक्रारदाराच्या बाजूने लावून देण्यासाठी हबीब सय्यद याने तक्रारदाराकडे १ लाख रुपयांच्या लाचेची मागणी गेल्या बुधवारी (दि. १३) केली होती. दाव्याचा निकाल तक्रारदाराच्या बाजूने लावण्यासाठी अधिकाऱ्यांना पैसे द्यावे लागतील, असे हबीबने सांगत लाचेची मागणी केली होती. नंतर तडजोडीअखेर ही रक्कम ४० हजार रुपये ठरली. या मागणीची पडताळणी लाचलुचपत विभागाच्या पथकाने केली. त्यानंतर आज सकाळी राहुरीतील नितीन हॉटेलमध्ये तक्रारदाराकडून हबीब सय्यद याने ४० हजार स्वीकारून ते शकील पठाण याच्याकडे दिले. त्याचवेळी दोघांना अटक करण्यात आली. मिळालेल्या माहितीनुसार या दोघा एजंटांचा राहुरीतील नोंदणी कार्यालय, श्रीरामपुरमधील प्रांत कार्यालयात वावर असतो. लाचलुचपत प्रतिबंधक विभागाचे उपअधीक्षक हरीश खेडकर यांच्या नेतृत्वाखाली सापळा रचण्यात आला.
