“मला हुडी, गॉगल घालून कुणाला भेटायची गरज नाही”, उद्धव ठाकरेंचं खोचक विधान; देवेंद्र फडणवीसांना टोला?

काय म्हणाले उद्धव ठाकरे?

उद्धव ठाकरेंना यावेळी पत्रकारांनी अजित पवारांच्या मुख्यमंत्रीपदाबाबत विचारणा केली. अजित पवार गटाकडून २०२४मध्ये तेच राज्याचे मुख्यमंत्री होतील, असे दावे केले जात असल्याबाबत विचारलं असता त्यावेळी उद्धव ठाकरेंनी त्यावरून खोचक टोला लगावला. “प्रत्येकाला स्वप्न बघण्याचा अधिकार आहे. अजून त्यावर कर लागलेला नाहीये. नाहीतर तीही यंत्रणा आपल्याकडे कदाचित येऊ शकते. ते म्हणू शकतात की ‘तुम्हाला पंतप्रधान होण्याचं स्वप्न पडलं होतं. त्यामुळे कर भरा’. पण जोपर्यंत असं काही होत नाही तोपर्यंत त्यांना स्वप्न बघायचं तर बघू द्या”, असं उद्धव ठाकरे म्हणाले.

देवेंद्र फडणवीसांना टोला?

दरम्यान, यावेळी उद्धव ठाकरेंनी राज्याचे दुसरे उपमुख्यमंत्री देवेंद्र फडणवीस यांनाही अप्रत्यक्ष टोला लगावला. “आज मी दिल्लीत विविध नेत्यांच्या भेटीगाठी सुरू करेन. आत्ता मी जरी थंडीसाठी जॅकेट घातलं असलं, तरी मला हुडी किंवा गॉगल घालून कुणाला भेटायची गरज नाही. जे करतो ते मी खुलेआम करतो”, असं उद्धव ठाकरे यावेळी म्हणाले.

गेल्या वर्षी महाराष्ट्रात झालेल्या सत्तांतरावेळी देवेंद्र फडणवीस राजकीय बैठकांसाठी वेश बदलून जात असत, असा खुलासा खुद्द फडणवीस यांच्या पत्नी अमृता फडणवीस यांनीच केला होता. त्यावर बरीच चर्चाही झाली होती. उद्धव ठाकरेंनी आज केलेलं विधान त्याच संदर्भात असल्याचं बोललं जात आहे.