सांगली : महापालिकेच्या वतीने चालविण्यात येत असलेल्या सावली बेघर केंद्रातील ५७ निराधारांचे बुधवारी लसीकरण करण्यात आले. तसेच या वेळी या ठिकाणी कार्यरत असलेल्या ९ सेवकांचेही लसीकरण करण्यात आले. करोनाच्या पहिल्या लाटेमध्ये येथील ४३ जणांना एकाच वेळी करोनाची बाधा झाली होती. योग्य उपचारानंतर ते करोनामुक्त झाले. सध्या या बेघर केंद्रामध्ये ६३ जणांचे वास्तव्य असून यापैकी सहा जणांना अन्य आजारामुळे रुग्णालयात दाखल करण्यात आले आहे. उर्वरित ५७ जणांचे आज लसीकरण करण्यात आले. तसेच या ठिकाणी कार्यरत असलेल्या ९ सेवकांनाही करोना प्रतिबंधक लस देण्यात आली. तसेच मिरज शहरामध्ये निराधार महिलांसाठी चालविण्यात येत असलेल्या आस्था बेघर निवारा केंद्रातील लाभार्थ्यांचेही लसीकरण करण्यात आले असल्याची माहिती उपायुक्त स्मृती पाटील यांनी दिली. या वेळी नगरसेवक प्रकाश मुळके, ज्योती सर्वदे, डॉ. वैभव पाटील, डॉ. वैशाली पवार, इन्साफ फौंडेशनचे मुस्तफा मुजावर, रियाज मुजावर उपस्थित होते.